வயதாகும்போது யாரை நம்புவது?

நாம் அனைவரும் வாழ்க்கையில் சவால்களை எதிர்கொள்கிறோம், அவற்றைக் கடக்க நமக்கு அடிக்கடி உதவி தேவைப்படுகிறது. வயதாகும்போது, ​​நம் சரீரம் மற்றும் மனதின் திறன்கள் குறைவதால், மற்றவர்களை சார்ந்திருப்பது அதிகரிக்கிறது. பைபிளில், சிறுவயது முதல் முதுமை வரை தனது வாழ்நாள் முழுவதும் பல சவால்களை எதிர்கொண்ட தாவீதிடமிருந்து நாம் கற்றுக் கொள்ளலாம். அவருக்கு போராட்டங்கள் இருந்தபோதிலும், வழியில் வந்த அனைத்தையும் அவரால் சமாளிக்க முடிந்தது. அவர் எப்படி ஜெயம் கொண்டார் என்பதை கற்றுக்கொள்வோம்.

 

தாவீதின் வாழ்க்கை அனுபவம் - துன்ப காலங்களில் தேவன் அவருக்கு அடைக்கலமாக இருந்தார்

தேவன் தனக்கு அடைக்கலமும் கோட்டையும் மேலும் தான் நம்பியிருக்கிறவர் என்றும் தாவீது கூறுகிறார். அவர் செய்த எல்லாவற்றிலும் இதுவே அவரது வாழ்க்கையில் அடித்தளமாக இருந்தது. இதை சங்கீதம் 91:2 இல் வாசிக்கிறோம். நான் கர்த்தரை நோக்கி: நீர் என் அடைக்கலம், என் கோட்டை, என் தேவன், நான் நம்பியிருக்கிறவர் என்று சொல்லுவேன். தாவீது தேவனை விசுவாசித்தார். ஏனெனில் தேவனே எல்லாவற்றுக்கும் ஆதாரமாக இருக்கிறார் என்று அவர் தனது இருதயத்திலும் ஆத்துமாவிலும் உண்மையாக விசுவாசித்தார். (உலகத் தேவை மற்றும் ஆன்மீகத் தேவைகள் (நீதி, விசுவாசம், அன்பு போன்றவை)).

• துன்பங்களிலிருந்து நம்மைக் காக்கும் கோட்டையாக தேவன் இருக்கிறார். தெய்வீக ஆசைகளுக்கும் தெய்வீகமற்ற பொல்லாத காரியங்களுக்கும் இடையில் போராட்டம் உண்டாவதால் தேவனுடைய பிள்ளைகளுக்கு பிரச்சனைகள் வருகின்றன. என் தேவனே, துன்மார்க்கனுடைய கைக்கும், நியாயக்கேடும் கொடுமையுமுள்ளவனுடைய கைக்கும் என்னைத் தப்புவியும். சங்கீதம் 71:4

அவருடைய நீதியில் அடைக்கலம்

• நாம் கடந்து செல்லும் போராட்டங்கள், தேவனுடன் நடக்கும் நீதியான பாதையிலிருந்து அநீதியான பாவம் நிறைந்த பாதைக்கு நம்மை அழைத்துச் செல்லக்கூடும். கர்த்தாவே, உம்மை நம்பியிருக்கிறேன்; நான் ஒருபோதும் வெட்கம் அடையாதபடி செய்யும். உமது நீதியினிமித்தம் என்னை விடுவித்து, என்னைக் காத்தருளும்; உமது செவியை எனக்குச் சாய்த்து, என்னை இரட்சியும். சங்கீதம் 71:1-2

• நம்முடைய சுய நற்கிரியைகளை நம்பாமல், தேவனிடம் அடைக்கலம் தேடும்படி தாவீது அறிவுரை கூறுகிறார். நாம் அவரது நீதியில் நம்பிக்கை வைக்க வேண்டும், அவர் நம்மைக் காத்து விடுவிப்பார். தேவன் தம் வேண்டுதலைக் கேட்டு தம்மைக் காக்கும்படி தாவீது கேட்கிறார்: உமது நீதியினிமித்தம் என்னை விடுவித்து, என்னைக் காத்தருளும்; உமது செவியை எனக்குச் சாய்த்து, என்னை இரட்சியும்.

• தாவீது (சங்கீதக்காரர்) தேவன் மீது விசுவாசம் வைத்திருந்ததால், நீதியாக செயல்பட்டு தன்னை விடுவிக்கும்படி நம்பிக்கையுடன் கேட்கிறார். தேவநீதி தனக்குச் சாதகமாகச் செயல்பட வேண்டுமென அவர் விரும்பினார்.

தேவனின் உண்மைத்தன்மையைத் தேடுவதன் மூலம் அடைக்கலத்தில் நிலைத்திருங்கள்

நான் எப்பொழுதும் வந்தடையத்தக்க கன்மலையாயிரும்; என்னை இரட்சிப்பதற்குக் கட்டளையிட்டீரே; நீரே என் கன்மலையும் என் கோட்டையுமாய் இருக்கிறீர். சங்கீதம் 71:3

• தாவீது அடைக்கலத்திற்காக தேவனை நோக்கிப் பார்க்கையில், அவர் மீதுள்ள விசுவாசத்தையும் பலப்படுத்துகிறார். "நான் எப்பொழுதும் வந்தடையத்தக்க கன்மலையாயிரும்" என்று சங்கீதம் 91:2 இல் வெளிப்படுத்தியதைப் போலவே கூறுகிறார்.

• "என்னை இரட்சிப்பதற்குக் கட்டளையிட்டீரே; நீரே என் கன்மலையும் என் கோட்டையுமாய் இருக்கிறீர்", என்று உங்கள் வாயால் விசுவாசத்துடன் சொல்லுங்கள்.

• விசுவாசத்தின் மூலம் அவருடைய அடைக்கலத்தில் நம்மை மறைத்துக் கொள்ளும் போது, ​​"...அவருடைய சத்தியம் உனக்குப் பரிசையும் கேடகமுமாகும்." சங்கீதம் 91:4

• தேவன் மீதான விசுவாசம் ஒரு கேடகமாக செயல்படுகிறது, மேலும் நாம் பலம் கொண்டு இருப்பதற்கும் வாழ்வின் புயல்களை கடக்கவும் உதவுகிறது.

• தாவீது இதை தனது எழுத்துக்களில் விவரிக்கிறார் (2 சாமுவேல் 22:2-4). சவுல் அவரது உயிரைப் பறிக்கப் பின்தொடர்ந்த நேரத்தில் இவ்வாறு கூறுகிறார், கர்த்தர் என் கன்மலையும், என் கோட்டையும், என் இரட்சகருமானவர். தேவன் நான் நம்பியிருக்கிற துருக்கமும், என் கேடகமும், என் இரட்சண்ணியக் கொம்பும், என் உயர்ந்த அடைக்கலமும், என் புகலிடமும், என் இரட்சகருமானவர்; என்னை வல்லடிக்கு நீங்கலாக்கி இரட்சிக்கிறவர் அவரே. ஸ்துதிக்குப் பாத்திரராகிய கர்த்தரை நோக்கிக் கூப்பிடுவேன்; அதனால் என் சத்துருக்களுக்கு நீங்கலாக்கி இரட்சிக்கப்படுவேன். 2 சாமுவேல் 22:2-4

தாவீது கர்த்தருக்குப் பிரியமான வாழ்க்கையை வாழ்ந்ததினால், கடைசி நாட்களில் அவர் வெற்றி பெற்றார்.

• “ …. அவர் தமது கண் கண்டபடி நியாயந்தீர்க்காமலும், தமது காது கேட்டபடி தீர்ப்புச்செய்யாமலும், நீதியின்படி ஏழைகளை நியாயம்விசாரித்து, யதார்த்தத்தின்படி பூமியிலுள்ள சிறுமையானவர்களுக்குத் தீர்ப்புச்செய்து, பூமியைத் தமது வாக்கின் கோலால் அடித்து, தமது வாயின் சுவாசத்தால் துன்மார்க்கரைச் சங்கரிப்பார். நீதி அவருக்கு அரைக்கட்டும், சத்தியம் அவருக்கு இடைக்கச்சையுமாயிருக்கும்”. ஏசாயா 11:3-5

 

தாவீதின் வாழ்க்கை அனுபவம் - சிறுவயதிலேயே ஆரம்பம் 

கர்த்தராகிய ஆண்டவரே, நீரே என் நோக்கமும், என் சிறுவயது தொடங்கி என் நம்பிக்கையுமாயிருக்கிறீர். நான் கர்ப்பத்தில் உற்பவித்தது முதல் உம்மால் ஆதரிக்கப்பட்டேன்; என் தாயின் வயிற்றிலிருந்து என்னை எடுத்தவர் நீரே; உம்மையே நான் எப்பொழுதும் துதிப்பேன். அநேகருக்கு நான் ஒரு புதுமை போலானேன்; நீரோ எனக்குப் பலத்த அடைக்கலமாயிருக்கிறீர். என் வாய் உமது துதியினாலும், நாள்தோறும் உமது மகத்துவத்தினாலும் நிறைந்திருப்பதாக. சங்கீதம் 71:5-8

• தாவீது தான் பிறந்தது முதல் தேவனிடத்தில் விசுவாசமாயிருந்ததாக கூறுகிறார். சங்கீதம் 71:6 இல் அவர் தனது சார்புநிலையை விவரிக்கிறார்: நான் கர்ப்பத்தில் உற்பவித்தது முதல் உம்மால் ஆதரிக்கப்பட்டேன்; என் தாயின் வயிற்றிலிருந்து என்னை எடுத்தவர் நீரே; உம்மையே நான் எப்பொழுதும் துதிப்பேன்.

• தாவீது தனது நம்பிக்கையை சகோதரர்கள் மீதோ அல்லது குடும்பத்தின் மீதோ வைக்கவில்லை. சிறுவயதிலிருந்தே அவருடைய நம்பிக்கை கர்த்தர் மேல் இருந்தது. கர்த்தராகிய ஆண்டவரே, நீரே என் நோக்கமும், என் சிறுவயது தொடங்கி என் நம்பிக்கையுமாயிருக்கிறீர். சங்கீதம் 71:5

  • தாவீதின் விசுவாசம் தேவனுடனான அவரது அனுபவங்களிலிருந்து வருகிறது. ஆடு மேய்க்கும் சிறுவனாக, சிங்கங்களையும் கரடிகளையும் கொன்று தன் ஆடுகளைப் பாதுகாப்பதில் தேவனை  நம்பினார்.

  • 1 சாமுவேல் 17:33-37 இல் விவரிக்கப்பட்டுள்ளபடி, கோலியாத்துடன் சண்டையிடும்படி கேட்கப்பட்டபோது, ​​தாவீது தனது சிறுவயதில் தேவனை நம்பிய அனுபவங்களை சவுல் ராஜாவுடன் பகிர்ந்து கொண்டார். அப்பொழுது சவுல் தாவீதை நோக்கி: நீ இந்தப் பெலிஸ்தனோடே எதிர்த்து யுத்தம்பண்ண உன்னால் ஆகாது; நீ இளைஞன், அவனோ தன் சிறுவயது முதல் யுத்தவீரன் என்றான். தாவீது சவுலைப்பார்த்து: உம்முடைய அடியான் என் தகப்பனுடைய ஆடுகளை மேய்த்துக்கொண்டிருக்கிறபோது, ஒரு விசை ஒரு சிங்கமும் ஒரு விசை ஒரு கரடியும் வந்து, மந்தையிலிருக்கிற ஒரு ஆட்டைப் பிடித்துக்கொண்டது. நான் அதைத் தொடர்ந்துபோய், அதை அடித்து, அதை அதின் வாய்க்குத் தப்புவித்தேன்; அது என்மேல் பாய்ந்தபோது, நான் அதின் தாடியைப் பிடித்து, அதை அடித்துக் கொன்று போட்டேன். அந்தச் சிங்கத்தையும் அந்தக் கரடியையும் உம்முடைய அடியானாகிய நான் கொன்றேன்; விருத்தசேதனமில்லாத இந்தப் பெலிஸ்தனும் அவைகளில் ஒன்றைப் போல இருப்பான்; அவன் ஜீவனுள்ள தேவனுடைய சேனைகளை நிந்தித்தானே என்றான். பின்னும் தாவீது: என்னைச் சிங்கத்தின் கைக்கும் கரடியின் கைக்கும் தப்புவித்த கர்த்தர் இந்தப் பெலிஸ்தனுடைய கைக்கும் தப்புவிப்பார் என்றான்; அப்பொழுது சவுல் தாவீதைப் பார்த்து: போ, கர்த்தர் உன்னுடனேகூட இருப்பாராக என்றான்.

• தாவீதின் வெற்றி தேவனின் கிரியைகளைத் துதிப்பதில் இருந்தது. நாம் அவரைத் துதிக்கும்போது, ​​புகார் கூறுவதற்கோ (முணுமுணுத்தல் / சூழ்நிலைகளைக் குறித்து புலம்புதல்) அல்லது விலகிச் செல்வதற்கோ (தேவனிடமிருந்து பின்வாங்குதல்) இடமில்லை. சங்கீதம் 71:8கூறுவது போல், "என் வாய் உமது துதியினாலும், நாள்தோறும் உமது மகத்துவத்தினாலும் நிறைந்திருப்பதாக".

• கடினமான காலங்களில் தேவனைத் துதிக்க நாம் எவ்வாறு கற்றுக்கொள்ளலாம்? அவரை விசுவாசிக்க கற்றுக்கொள்வது தான் திறவுகோல். அவரே ஆதாரம், என்னை இதிலிருந்து வெளியே கொண்டு வரும் அடைக்கலம் அவர் தான் என்ற விசுவாசம். அவருடைய வார்த்தையை அறிந்து கொள்ள வேண்டும். அவருடைய வார்த்தை அவரை மேலும் நம்புவதற்கு நம்மை பலப்படுத்துகிறது. அவரை அறியும் போது விசுவாசம் வருவது போல, அவரை விசுவாசிக்கும் போது துதி வருகிறது. நீங்கள் நம்பாத ஒருவரை உங்களால் உண்மையிலேயே பாராட்ட முடியாது. சில சோதனைகள் உங்கள் வழியில் வர அனுமதிப்பதற்காக தேவனின் நற்குணத்தையோ அல்லது உண்மைத்தன்மையையோ உங்கள் ஆழ்மனதில் சந்தேகித்தால், நீங்கள் அவரை நம்பவில்லை. நம்பாமல் உங்களால் அவரை உண்மையாகத் துதிக்க முடியாது.
  

தாவீதின் வாழ்க்கை அனுபவம் - வயது முதிர்ந்த போது

தாவீது தனது சொந்த மகன் அப்சலோமுடன் மோதலை எதிர்கொண்டார் (2 சாமுவேல் 17-18). மேலும் பெலிஸ்தியர்களுக்கு எதிரான போர்களிலும் ஈடுபட்டார் (2 சாமுவேல் 21:15-22), தனக்குப் பிரியமானவர் எதிர்கொண்டு வந்ததை கையாண்டது, தான் ஈடுபட்ட போர்கள் இது போன்ற அனுபவங்களிலிருந்து எழுதுகிறார் : முதிர்ந்த வயதில் என்னைத் தள்ளிவிடாமலும், என் பெலன் ஒடுங்கும்போது என்னைக் கைவிடாமலும் இரும். என் சத்துருக்கள் எனக்கு விரோதமாய்ப் பேசி, என் ஆத்துமாவுக்குக் காத்திருக்கிறவர்கள் ஏகமாய் ஆலோசனைபண்ணி: தேவன் அவனைக் கைவிட்டார், அவனைத் தொடர்ந்து பிடியுங்கள்; அவனை விடுவிப்பார் இல்லை என்கிறார்கள். சங்கீதம் 71:9-11

ஆனால், அவரது விசுவாசம் தேவன் மேல் இருந்தது.

நானோ எப்பொழுதும் நம்பிக்கைகொண்டிருந்து, மேன்மேலும் உம்மைத் துதிப்பேன். என் வாய் நாள்தோறும் உமது நீதியையும் உமது இரட்சிப்பையும் சொல்லும்; அவைகளின் தொகையை நான் அறியேன். கர்த்தராகிய ஆண்டவருடைய வல்லமையை முன்னிட்டு நடப்பேன்; உம்முடைய நீதியைப்பற்றியே மேன்மை பாராட்டுவேன். தேவனே, என் சிறுவயதுமுதல் எனக்குப் போதித்து வந்தீர்; இதுவரைக்கும் உம்முடைய அதிசயங்களை அறிவித்து வந்தேன். இப்பொழுதும் தேவனே, இந்தச் சந்ததிக்கு உமது வல்லமையையும், வரப்போகிற யாவருக்கும் உமது பராக்கிரமத்தையும் நான் அறிவிக்குமளவும், முதிர்வயதும் நரைமயிருமுள்ளவனாகும் வரைக்கும் என்னைக் கைவிடீராக. தேவனே, உம்முடைய நீதி உன்னதமானது, பெரிதானவைகளை நீர் செய்தீர்; தேவனே, உமக்கு நிகரானவர் யார்? சங்கீதம் 71:14-19

தாவீது எப்படி இந்த நிலையை அடைந்தார்? அவருடைய இளமைப் பருவம் அவரை வடிவமைத்தது என்பதை நாம் அறிவோம். ஆனால் ஒரு வளமான ராஜாவாக இருந்தபோதும், பாதுகாப்பிற்காக அவர் செல்வத்தை நம்பியிருக்கவில்லை.

• செல்வம் அல்லது உடைமைகளை நம்புதல்: பாதுகாப்புக்காக கார் அல்லது அது போன்ற பிற உடைமைகளை நாம் சார்ந்திருக்கக் கூடாது. வேதம் கூறுகிறது, சிலர் இரதங்களைக் குறித்தும், சிலர் குதிரைகளைக் குறித்தும் மேன்மை பாராட்டுகிறார்கள்; நாங்களோ எங்கள் தேவனாகிய கர்த்தருடைய நாமத்தைக் குறித்தே மேன்மை பாராட்டுவோம். சங்கீதம் 20:7. மேலும் சங்கீதம் 33:17 இல் "இரட்சிக்கிறதற்குக் குதிரை விருதா; அது தன் மிகுந்த வீரியத்தால் தப்புவியாது" என்று கூறப்பட்டுள்ளது. தாவீதின் காலத்தில்  குதிரைகள் மற்றும் ரதங்கள் பயன்பாட்டில் இருந்தன, நம் நாட்களில் அது நமது கார் / ஸ்கூட்டர் மற்றும் நம்மிடம் உள்ள பிற செல்வங்களைக் குறிக்கிறது. பொருட்களின் மீது நம்பிக்கை வைக்க வேண்டாம் என்று இது நமக்குக் கற்பிக்கிறது.

• இராணுவம் / வில் & அம்புகளின் மீதான நம்பிக்கை: நமது பாதுகாப்பிற்காக வில், அம்பு போன்ற ஆயுதங்களை நம்பக்கூடாது. தாவீதின் நாட்களில் அது அவருடைய வில் மற்றும் அம்பு, இன்று நமக்கென்று தனிப்பட்ட பாதுகாப்பு, வீடுகளில் கூடுதல் பூட்டுகள், தீயணைப்பு கருவிகள் போன்ற யாவும் உள்ளன. வேதம் கூறுகிறது, என் வில்லை நான் நம்பேன், என் பட்டயம் என்னை இரட்சிப்பதில்லை. நீரே எங்கள் சத்துருக்களினின்று எங்களை இரட்சித்து, எங்களைப் பகைக்கிறவர்களை வெட்கப்படுத்துகிறீர். சங்கீதம் 44:6-7. பிரச்சனைகளில் இருந்து நம்மை காக்க போலீஸ் / ராணுவத்தை முழுமையாக சார்ந்து இருக்க முடியாது, தேவன் மட்டுமே நமக்கு தனிப்பட்ட பாதுகாப்பாக செயல்படுவார்.

• பிறரை (அகித்தோப்பேல்) நம்பியது (நம்முடைய சூழலில் நண்பர்கள் அல்லது அண்டை வீட்டாரை நம்புதல்)

  • அகித்தோப்பேல் தாவீதுக்கும் அப்சலோமுக்கும் ஆலோசகராக  இருந்தார். தாவீது பல விஷயங்களில் அவரது ஆலோசனையை நம்பியிருந்தார். இதைப் பற்றி 2 சாமுவேல் 16:23 இல் வாசிக்கிறோம்,  அந்நாட்களில் அகித்தோப்பேல் சொல்லும் ஆலோசனை தேவனுடைய வாக்கைப்போல இருந்தது; அப்படி அகித்தோப்பேலின் ஆலோசனையெல்லாம் தாவீதுக்கும் இருந்தது, அப்சலோமுக்கும் அப்படியே இருந்தது. இப்படித்தான் தாவீதும் அப்சலோமும் அகித்தோப்பலின் அறிவுரைகள் அனைத்தையும் மதித்தனர்.

  • அதே அகித்தோப்பேல் தான் தாவீதுக்கு எதிராக யுத்தம் செய்ய சதி செய்தார். தாவீது, தேவன் அகித்தோப்பேலுக்கு எதிராக யுத்தம் பண்ணவும் தேவனுடைய ஆலோசனைக்காகவும் தேவனிடம் வேண்டினார். அப்சலோமோடே கட்டுப்பாடு பண்ணினவர்களுடன் அகித்தோப்பேலும் சேர்ந்திருக்கிறான் என்று தாவீதுக்கு அறிவிக்கப்பட்டபோது, தாவீது: கர்த்தாவே, அகித்தோப்பேலின் ஆலோசனையைப் பயித்தியமாக்கிவிடுவீராக என்றான். 2 சாமுவேல் 15:31

  • நாம் மனுஷரையோ செல்வாக்கு உள்ளவர்களையோ நம்பி இருக்கக்கூடாது. விஷயங்கள் நன்றாக நடக்கும் போது அவர்கள் நம்மிடம் அன்பாக நடந்து கொள்ளலாம், கஷ்ட காலங்களில் நம்மை கைவிட்டு விடலாம். அதனால்தான் தாவீது இவ்வாறு கூறினார், மனுஷனை நம்புவதைப் பார்க்கிலும், கர்த்தர் பேரில் பற்றுதலாயிருப்பதே நலம். பிரபுக்களை நம்புவதைப் பார்க்கிலும், கர்த்தர் பேரில் பற்றுதலாயிருப்பதே நலம். சங்கீதம் 118:8-9   

• குடும்பத்தின் மீது நம்பிக்கை - அப்சோலாம் தாவீதுக்கு எதிராக போர் தொடுத்தார்

  • நாம் நம் குடும்ப உறுப்பினர்களை மட்டுமே நம்பி இருக்கக் கூடாது -அவர்கள் நேர்மையற்றவர்கள் என்பதால் அல்ல, அவர்களுக்கு சொந்த வரம்புகள் இருக்கின்றன. காதல் திருமண வாழ்க்கையில் கூட, தங்கள் இணையர்கள் உதவ முடியாமல் போவதால், ஒவ்வொரு இணையரும் தனியாக சவால்களை எதிர்கொள்ள நேரிடலாம். தேவனுக்கு எப்போதும் முதல் இடம் கொடுக்கப்பட வேண்டும் என்பதை நினைவில் கொள்வது அவசியம், திருமண உறவுகளிலும் கூட. வேதம் கூறுகிறது, சிநேகிதனை விசுவாசிக்கவேண்டாம், வழிகாட்டியை நம்பவேண்டாம்; உன் மடியிலே படுத்துக்கொள்ளுகிறவளுக்கு முன்பாக உன் வாயைத் திறவாமல் எச்சரிக்கையாயிரு. நானோவென்றால் கர்த்தரை நோக்கிக்கொண்டு, என் இரட்சிப்பின் தேவனுக்குக் காத்திருப்பேன்; என் தேவன் என்னைக் கேட்டருளுவார். மீகா 7:5,7

• நம்மையே நம்பி இருத்தல் 

  • நம்மை நாமே நம்பி இருக்கக் கூடாது. ரதங்கள், குதிரைகள், வில் மற்றும் அம்புகளால் நம்மைக் காப்பாற்ற முடியாது - முன்பு பார்த்தபடி, நண்பர்கள் / குடும்ப உறுப்பினர்கள் எப்போதும் உதவ முடியாது.

  • அப்படிப்பட்ட சூழ்நிலைகளில், "நான் இப்போது என்னையே நம்பியிருக்க வேண்டும்" என்று நாம் நினைக்கலாம். ஆனால், தேவன்  இதையும் ஏற்பதில்லை. நாம் நம்பியிருக்கும் அனைத்தையும் அவர் அகற்றிவிட்டு, நம்மீது நம்பிக்கை வைக்க வேண்டாம் என்று நமக்குக் கற்பிக்கக்கூடும்.

  • அப்போஸ்தலர் பவுலும் இதேபோன்ற சூழ்நிலையை அனுபவித்தார். அதில் அவர் தன்னை விட தேவன் மேல் நம்பிக்கையாயிருந்ததாக  கூறுகிறார், நாங்கள் எங்கள்மேல் நம்பிக்கையாயிராமல், மரித்தோரை எழுப்புகிற தேவன்மேல் நம்பிக்கையாயிருக்கத்தக்கதாக, மரணம் வருமென்று நாங்கள் எங்களுக்குள்ளே நிச்சயித்திருந்தோம். 2 கொரிந்தியர் 1:9

வாழ்க்கைப் போராட்டங்களில் உங்களுக்கு வலிமை தரவும், உங்கள் அடைக்கலமாக இருக்கவும் தேவனிடம் ஜெபியுங்கள். செல்வம், கார், பணம், வீடு போன்ற ஜடப்பொருட்களை நம்பாதீர்கள்; உங்கள் குடும்பத்தினர், நண்பர்கள் அல்லது உங்கள் சொந்த திறன்களை மட்டும் சார்ந்து இருக்க வேண்டாம். உங்களுக்கு என்ன வயதாக இருந்தாலும் தேவன் மட்டுமே உங்களுக்கு உண்மையிலேயே உதவ முடியும். நீங்கள் தேவனின் நற்குணத்தை அனுபவித்து அவரைச் சார்ந்திருக்கும் போது இது நிகழ்கிறது. தாவீது தேவனின் பிரசன்னம் தங்கத்தை விட விலையேறப்பெற்றது என்றும் தேன் கூட்டை விட இனிமையானது என்றும்  விவரிக்கிறார். அவைகள் பொன்னிலும், மிகுந்த பசும்பொன்னிலும் விரும்பப்படத்தக்கதும், தேனிலும் தேன்கூட்டிலிருந்து ஒழுகும் தெளிதேனிலும் மதுரமுள்ளதுமாய் இருக்கிறது. சங்கீதம் 19:10

இந்த மாற்றத்தை அனுபவிக்க உங்களுக்கு உதவ தேவனிடம் ஜெபியுங்கள். உங்களுக்கு விருப்பம் இருந்தாலும், நம் மனித இயல்பு அவரை சார்ந்திருப்பதை கடினமாக்குகிறது. தொடர்ந்து ஜெபித்து அவருடைய வார்த்தையை மீண்டும் மீண்டும் படித்து அதைத் தியானியுங்கள். இறுதி வரை தினமும் தேவனை சார்ந்து வாழ்ந்த தாவீதைப் போல வாழ முயற்சி செய்யுங்கள். தோல்விகளால் மனம் தளராதீர்கள். நீங்கள் எத்தனை முறை தோல்வியுற்றாலும், அவர் அன்பானவர் மற்றும் உதவ எப்போதும் தயாராக இருக்கிறார். அவரை சார்ந்திருப்பதிலிருந்து உங்களைத் திசைதிருப்ப சாத்தான் முயற்சி செய்யலாம், குறிப்பாக நீங்கள் எதிர்பார்த்தபடி உங்கள் ஜெபங்களுக்குப் பதில் கிடைக்காவிட்டால் திசை திருப்ப முயலுவான். இந்த தந்திரத்தில் விழுந்துவிடாதீர்கள். தாவீதின் அறிவுரையைப் பின்பற்றுங்கள் — நம்மில் பெரும்பாலானவர்களை விட மிகவும் சவாலான சூழ்நிலைகளை அவர் எதிர்கொண்டார். தேவனை விசுவாசிப்பதை அவருடைய வாழ்க்கை அனுபவத்திலிருந்து கற்றுக்கொள்வோம்.