கிறிஸ்துவின் அடிப்படைகளுக்குத் திரும்புவோம் - வேதாகமம்

“கிறிஸ்துவின் அடிப்படைகளுக்குத் திரும்புவோம்" என்ற புதிய தொடரைத் தொடங்கி இருக்கின்றேன். இந்தத் தொடரில், இயேசுவுடனான நமது உறவை வலுப்படுத்த ஒவ்வொரு தலைப்பையும் வேதாகமக் கண்ணோட்டத்தில் முழுமையாக ஆராயலாம்.

கிறிஸ்தவத்தின் அடிப்படைகளில் இருந்து தொடங்கலாம். மூன்றாவது தலைப்பு வேதாகமம்.

நமது ஆவிக்குரிய வளர்ச்சிக்கு வேதாகமம் எவ்வாறு பயனுள்ளதாக இருக்கும் என்றும், புதிய உடன்படிக்கை மற்றும் பழைய உடன்படிக்கை வாழ்க்கை ஒன்றுக்கொன்று எவ்வாறு வேறுபடுகிறது என்றும், எவ்வாறு வேதத்தைத் தியானிக்க வேண்டும் என்றும் பார்க்கலாம்.

வேதாகமம்

தேவன், தமது வார்த்தைகளை தீர்க்கதரிசிகள் / போதகர்கள் / ராஜாக்கள் / அப்போஸ்தலர்கள் / சீஷர்கள் மூலம் மனிதர்களுக்கு வெளிப்படுத்தினார். அவர்கள் இந்த வார்த்தைகளை எல்லாம் வேதப் புத்தகமாக எழுதினார்கள். இது நம்மிடம் பேசுவதற்கான தேவனின் வார்த்தையாக மட்டும் செயல்படாமல் 2 தீமோத்தேயுவில் பவுல் எழுதியிருப்பதைப் போல் செயல்படுகிறது. வேதவாக்கியங்களெல்லாம் தேவ ஆவியினால் அருளப்பட்டிருக்கிறது; தேவனுடைய மனுஷன் தேறினவனாகவும், எந்த நற்கிரியையுஞ்செய்யத் தகுதியுள்ளவனாகவும் இருக்கும்படியாக, அவைகள் உபதேசத்துக்கும், கடிந்துகொள்ளுதலுக்கும், சீர்திருத்தலுக்கும், நீதியைப் படிப்பிக்குதலுக்கும் பிரயோஜனமுள்ளவைகளாயிருக்கிறது. 2 தீமோத்தேயு 3:16-17

வேதாகமம் தேவ ஆவியினால் அருளப்பட்டு இருக்கிறது. எனவே தான் இது "தேவனுடைய வார்த்தை" என்று அழைக்கப்படுகிறது. வேதத்தைப் படிக்கும்போது, ​​அது கற்பிப்பது, திருத்துவது, நமது பாவங்களுக்காக நம்மைக் கடிந்துகொள்வது, அவரது நீதியான பாதையில் நம்மைப் பயிற்றுவிப்பது போன்ற அதன் எல்லா நோக்கத்தையும் நிறைவு செய்கிறது. அது எப்படி செய்கிறது?

தேவனுடைய வார்த்தையானது ஜீவனும் வல்லமையும் உள்ளதாயும், இருபுறமும் கருக்குள்ள எந்தப் பட்டயத்திலும் கருக்கானதாயும், ஆத்துமாவையும், ஆவியையும், கணுக்களையும் ஊனையும் பிரிக்கத்தக்கதாக உருவக் குத்துகிறதாயும், இருதயத்தின் நினைவுகளையும் யோசனைகளையும் வகையறுக்கிறதாயும் இருக்கிறது. எபிரெயர் 4:12

வேதத்தில் பழைய ஏற்பாடும் புதிய ஏற்பாடும் உள்ளது - புதிய ஏற்பாடு கிறிஸ்துவுக்குப் பின் வரும் வார்த்தையை விவரிக்கிறது. இந்த ஆய்வின் பிற்பகுதியில் இந்த வேறுபாடுகளைக் கற்றுக்கொள்வோம்.

நாம் எந்த காலத்தில் வாழ்ந்தாலும் வேதம் எப்பொழுதும் தற்போதைய சூழ்நிலைக்கு ஏற்ப இருக்கிறது. நாம் 21 அல்லது 22 ஆம் நூற்றாண்டில் வாழலாம், வேதத்தில் உள்ள வார்த்தைகள் நாம் எந்த நேரத்தில் வாழ்கிறோம் என்பதற்கான சூழலில் எப்போதும் இருக்கும். வேதத்தின் எந்தப் பகுதியும் பயன் இல்லாதது கிடையாது . ஒவ்வொரு காற்புள்ளி, முற்றுப்புள்ளி மற்றும் வார்த்தைக்கும் ஒரு அர்த்தம் உள்ளது.

தேவனிடம் நெருங்கி வர உதவும் வெவ்வேறு நோக்கங்கள் வேதத்தில் உள்ளன.

1. தேவ வசனம் — இயேசுவோடு நம் வாழ்வு, உலகில் நாம் உண்ணும் உணவினால் அல்ல, தேவனிடம் இருந்து வருகின்ற வார்த்தையிலே இருக்கிறது. அவர் பிரதியுத்தரமாக: மனுஷன் அப்பத்தினாலேமாத்திரமல்ல, தேவனுடைய வாயிலிருந்து புறப்படுகிற ஒவ்வொரு வார்த்தையினாலும் பிழைப்பான் என்று எழுதியிருக்கிறதே என்றார். மத்தேயு 4:4

2. கர்த்தரின் / கிறிஸ்துவின் வசனம் - கர்த்தருடைய வார்த்தையில் இயேசு கிறிஸ்துவே மையமாக இருக்கிறார்.கிறிஸ்துவின் வசனம் உங்களுக்குள்ளே சகல ஞானத்தோடும் பரிபூரணமாக வாசமாயிருப்பதாக; சங்கீதங்களினாலும் கீர்த்தனைகளினாலும் ஞானப்பாட்டுகளினாலும் ஒருவருக்கொருவர் போதித்து புத்திசொல்லிக்கொண்டு, உங்கள் இருதயத்திலே கர்த்தரைப் பக்தியுடன் பாடி; கொலோசெயர் 3:16

3. தீர்க்கதரிசன வசனம் - தேவன் நமக்கு கொடுத்திருக்கிற வேதம் மனித தீர்க்கதரிசியின் விளக்கம் அல்ல. தீர்க்கதரிசிகளுக்கும் / போதகர்களுக்கும் வார்த்தையை எழுதுவதற்காக தேவனின் பரிசுத்த ஆவியானவரால் அருளப்பட்டு இருக்கிறது. ஆகவே, தேவனிடம் இருந்து நேரடியாக பெற்றுக் கொள்வதால் இதை பயபக்தியோடு வாசிக்க வேண்டும். இதில் பொருந்தாதது என்று எதுவும் இல்லை. எல்லாவற்றிற்கும் ஒரு பொருள் / சூழல் உள்ளது. தீர்க்கதரிசனமானது ஒருகாலத்திலும் மனுஷருடைய சித்தத்தினாலே உண்டாகவில்லை; தேவனுடைய பரிசுத்த மனுஷர்கள் பரிசுத்த ஆவியினாலே ஏவப்பட்டுப் பேசினார்கள். 2 பேதுரு 1:21

4. நற்செய்தியின் வசனம் - புறஜாதிகளாகிய நாம் சுவிசேஷத்தைக் கேட்டு விசுவாசிக்க வேண்டும் என்பதற்காக வேதம் கொடுக்கப்பட்டுள்ளது. இது மனிதகுலத்திற்கு இயேசுவிடமிருந்து வரும் ஒரு நற்செய்தி. மிகுந்த தர்க்கம் உண்டானபோது, பேதுரு எழுந்து, அவர்களை நோக்கி: சகோதரரே, நீங்கள் அறிந்திருக்கிறபடி புறஜாதியார் என்னுடைய வாயினாலே சுவிசேஷ வசனத்தைக் கேட்டு விசுவாசிக்கும்படி தேவன் அநேக நாட்களுக்கு முன்னே உங்களில் ஒருவனாகிய என்னைத் தெரிந்துகொண்டார். அப்போஸ்தலர் 15:7

5. இரட்சிப்பின் (பாவத்திலிருந்து விடுதலை தரும்) வசனம் - வேதத்தில் நாம் படிக்கும் இரட்சிப்பின் செய்தி, நம்மை பாவத்திலிருந்து விடுதலை ஆக்குகிறது. உலகம் பாவத்தால் நிரம்பியுள்ளது, ஒவ்வொரு நாளும் நம்மைச் சுற்றியுள்ள பாவத்தை அகற்றி, பாவமற்ற வாழ்க்கையை வாழ அழைக்கப்படுகிறோம். “தேவனுடைய வார்த்தையானது ஜீவனும் வல்லமையும் உள்ளதாயும்,…”. எபிரேயர் 4:12

6. ஒப்புரவாக்குதலின் வசனம் - தேவனுடைய வார்த்தை நமக்கும் தேவனுக்கும் இடையே ஒரு ஒப்புரவாக்கும் பாலமாக செயல்படுகிறது, நம் வாழ்விலிருந்து பாவத்தை அகற்றும் விஷயங்களை ஊக்குவித்து, பிதாவிடம் ஒப்புரவாகும்படி நம்மை ஒப்புக்கொடுக்கிறது. அதென்னவெனில், தேவன் உலகத்தாருடைய பாவங்களை எண்ணாமல், கிறிஸ்துவுக்குள் அவர்களைத் தமக்கு ஒப்புரவாக்கி, ஒப்புரவாக்குதலின் உபதேசத்தை எங்களிடத்தில் ஒப்புவித்தார். 2 கொரிந்தியர் 5:19

7. தேவ கிருபை மற்றும் விசுவாசத்தின் வசனம் - தேவனின் வார்த்தை நமக்கு கிருபையை அளிக்கிறது (தேவனுக்கும் அவருடைய கிருபையுள்ள வசனத்துக்கும்). வேதத்தைப் படிப்பதன் மூலம் விசுவாசத்தில் பரிசுத்தமாக்கப்படுவதற்கு நாம் புத்துயிர் பெறுகிறோம். இப்பொழுதும் சகோதரரே, நீங்கள் பக்திவிருத்தியடையவும், பரிசுத்தமாக்கப்பட்ட அனைவருக்குள்ளும் உங்களுக்குச் சுதந்தரத்தைக் கொடுக்கவும் வல்லவராயிருக்கிற தேவனுக்கும் அவருடைய கிருபையுள்ள வசனத்துக்கும் உங்களை ஒப்புக்கொடுக்கிறேன். அப்போஸ்தலர் 20:32

8. சத்திய வசனம் - நாம் சாத்தானுக்கு முன்னால் நிற்கும்போது போராடுவதற்கு சத்திய வார்த்தை நமக்கு உதவுகிறது. இது சாத்தானின் வஞ்சகங்களையும் பொய்களையும் எதிர்த்துப் போராட உதவுகிறது. சத்தியவசனத்திலும், திவ்விய பலத்திலும்; நீதியாகிய வலதிடதுபக்கத்து ஆயுதங்களைத் தரித்திருக்கிறதிலும், 2 கொரிந்தியர் 6:7

9. ஜீவ வசனம் - இருளை வெளியேற்றும் வார்த்தை. நித்தியம் வரை நாம் வைத்திருக்கும் மூச்சு இது. நாம் கடைசி மூச்சு வரை இந்த வசனத்தைப் பிடித்துக் கொண்டால் - கிறிஸ்துவின் நாளில் நான் வீணாக ஓடினதும், வீணாகப் பிரயாசப்பட்டதுமில்லை என்ற மகிழ்ச்சி நமக்கு உண்டாயிருக்கும். நான் வீணாக ஓடினதும் வீணாகப் பிரயாசப்பட்டதுமில்லையென்கிற மகிழ்ச்சி கிறிஸ்துவின் நாளில் எனக்கு உண்டாயிருப்பதற்கு, ஜீவவசனத்தைப் பிடித்துக்கொண்டு, உலகத்திலே சுடர்களைப்போலப் பிரகாசிக்கிற நீங்கள், பிலிப்பியர் 2:14

10. நீதியின் வசனம் - நாம் இயேசுவைப் போல நீதிமான்களாக ஆவதற்கு நம்மை வழிநடத்தவும் நமக்குக் கற்பிக்கவும் தேவனுடைய வசனத்தை சார்ந்து இருக்கிறோம். பாலுண்கிறவன் குழந்தையாயிருக்கிறபடியினாலே நீதியின் வசனத்தில் பழக்கமில்லாதவனாயிருக்கிறான். எபிரேயர் 5:13

பழைய ஏற்பாடு vs புதிய ஏற்பாடு

பலர் வேதாகமத்தை படிக்கத் தொடங்கும் போது, குழப்பமடைந்து, பழைய ஏற்பாட்டை மட்டும் படித்துவிட்டு, புதிய ஏற்பாட்டைப் புறக்கணிக்கலாமா? அல்லது புதிய ஏற்பாட்டை மட்டும் படித்துவிட்டு, பழைய ஏற்பாட்டைப் புறக்கணிக்கலாமா? என்று சொல்கிறார்கள். வேதத்தில் உள்ள ஒவ்வொரு வார்த்தையும் தேவனால் அருளப்பட்டிருக்கிறது, எதையும் புறக்கணிக்க முடியாது. இரண்டிற்குமான முக்கிய வேறுபாடுகளை நாம் புரிந்து கொள்ள வேண்டும்.

1. பிரமாணம் மற்றும் அதின் கிரியைகள்

• பழைய ஏற்பாடு தேவன் மோசேக்குக் கொடுத்த பிரமாணங்களால் நிரம்பியிருக்கிறது - இந்நாளில் இருக்கிறதுபோல, நம்மை அவர் உயிரோடே காப்பதற்கும், எந்நாளும் நன்றாயிருக்கிறதற்கும், நம்முடைய தேவனாகிய கர்த்தருக்குப் பயந்து இந்த எல்லாக் கட்டளைகளின்படியேயும் செய்யக் கர்த்தர் நமக்குக் கட்டளையிட்டார். நம்முடைய தேவனாகிய கர்த்தர் நமக்குக் கட்டளையிட்டபடியே நாம் அவர் சமூகத்தில் இந்த எல்லாக் கட்டளைகளின்படியும் செய்யச் சாவதானமாயிருந்தால், நமக்கு நீதியாயிருக்கும் என்று சொல்வாயாக. உபாகமம் 6:24-25

• புதிய ஏற்பாடு - இயேசு தாம் ஒருபோதும் நியாயப்பிரமாணத்தை அழிக்கிறதற்கு வரவில்லை என்றும் மாறாக நம் செயல்கள் அவருடைய பார்வையில் நீதியாக விளங்கும்படிக்கு அவற்றை நிறைவேற்றுவதற்காக வந்ததாக குறிப்பிட்டார். நியாயப்பிரமாணத்தையானாலும் தீர்க்கதரிசனங்களையானாலும் அழிக்கிறதற்கு வந்தேன் என்று எண்ணிக்கொள்ளாதேயுங்கள்; அழிக்கிறதற்கு அல்ல, நிறைவேற்றுகிறதற்கே வந்தேன். மத்தேயு 5:17.

• பிரமாணம் ஒரு வெப்பமானி (தெர்மோமீட்டர்) போன்றது; அதை வைத்து காய்ச்சலை குணப்படுத்த முடியாது.

• பிரமாணம் வெறுமனே பாவத்தின் முகமூடியை அவிழ்க்கிறது. இப்படியிருக்க, பாவத்தை அறிகிற அறிவு நியாயப்பிரமாணத்தினால் வருகிறபடியால், எந்த மனுஷனும் நியாயப்பிரமாணத்தின் கிரியைகளினாலே தேவனுக்கு முன்பாக நீதிமானாக்கப்படுவதில்லை.ரோமர்3:20

• கிறிஸ்துவில் நாம் கொண்டுள்ள விசுவாசத்தினால் நியாயப்பிரமாணத்தின் கிரியைகள் நிறைவேறுகின்றன. நாம் விசுவாசிக்க ஆரம்பித்தவுடன் மனந்திரும்புதல், பாவங்களை ஒப்புக்கொள்வது, ஜலத்தினால் ஞானஸ்நானம், திருவிருந்து, ஒப்புரவு, திருப்பிக் கொடுத்தல் முதலியவற்றைச் செய்வதற்கான செயல்களால் நாம் நிரப்பப்படுகிறோம். இது தேவனின் பார்வையில் நீதிமான்களாக்கும் செயல்களுக்கு நம்மை வழிநடத்துகிறது.

• நியாயப்பிரமாணத்தின் நீதியினால் மட்டும் நாம் தேவனுடைய ராஜ்யத்தில் பிரவேசிக்க முடியாது. வேதபாரகர் பரிசேயர் என்பவர்களுடைய நீதியிலும் உங்கள் நீதி அதிகமாயிராவிட்டால், பரலோகராஜ்யத்தில் பிரவேசிக்கமாட்டீர்கள் என்று உங்களுக்குச் சொல்லுகிறேன். மத்தேயு 5:20

2. ஆசாரியத்துவம் Vs அனைத்து விசுவாசிகளின் ஆசாரியத்துவம்

• பழைய ஏற்பாட்டில், ஆசாரியத்துவம் என்பது லேவி கோத்திரத்தார்க்கு மட்டுமே இருந்தது. லேவியின் புத்திரரில் ஆசாரியத்துவத்தை அடைகிறவர்களும், ஆபிரகாமின் அரையிலிருந்துவந்த தங்கள் சகோதரரான ஜனங்களின் கையிலே நியாயப்பிரமாணத்தின்படி தசமபாகம் வாங்குகிறதற்குக் கட்டளைபெற்றிருக்கிறார்கள். எபிரேயர் 7:5

• புதிய ஏற்பாட்டில் - சிலுவையில் கிறிஸ்துவின் தியாகம் - அவர் தேவனுடைய குமாரனாயிருந்ததினால் பிரதான ஆசாரியரானார். அந்தப்படியே கிறிஸ்துவும் பிரதான ஆசாரியராகிறதற்குத் தம்மைத்தாமே உயர்த்தவில்லை; நீர் என்னுடைய குமாரன், இன்று நான் உம்மை ஜெநிப்பித்தேன் என்று அவரோடே சொன்னவரே அவரை உயர்த்தினார். எபிரேயர் 5:5

• நாம் "லேவிய முறைப்படி" ஆசாரியர்கள் ஆகவில்லை. நாம் தேவனின் குமாரரும் குமாரத்திகளுமாயிருப்பதால் ஆசாரியர்களாக ஆக்கப்பட்டோம்! தேவனின் பிள்ளைகள் அனைவரும் ஆசாரியர்களாக இருப்பதால், அவர்கள் யாவரும் "சகோதர சகோதரிகள்".நீங்களோ ரபீ என்றழைக்கப்படாதிருங்கள்; கிறிஸ்து ஒருவரே உங்களுக்குப் போதகராயிருக்கிறார், நீங்கள் எல்லாரும் சகோதரராயிருக்கிறீர்கள். மத்தேயு 23:8

3. தேவனின் ஆலயம் vs ஆவியில் தேவனைத் தொழுதல்

• பழைய ஏற்பாட்டில் தேவனை ஓர் ஸ்தலத்தில் சென்று தொழுது கொள்ள வேண்டும் என்பது கட்டளையாக இருந்தது. மேலும் எல்லா ஜனங்களும் (கோத்திரத்தாரும்) எல்லா பலிகளையும் அந்தக் குறிப்பிட்ட ஸ்தலத்தில் தான் செலுத்த வேண்டும். ஆசாரியரான லேவி புத்திரர் மட்டுமே பரிசுத்த ஸ்தலத்திற்குள்ளே நுழைய முடியும். பிற ஜனங்கள் யாவரும் வெளிப்பிரகாரத்தில் நுழைய மட்டுமே அனுமதிக்கப்பட்டார்கள், தங்கள் பாவங்களிலிருந்து சுத்தமாக ஆடுகள் / காளைகள் / புறாக்களின் இரத்தத்தை அங்கேயே செலுத்தினர்.

  • உங்கள் தேவனாகிய கர்த்தர் தம்முடைய நாமம் விளங்கும்படி, உங்கள் சகல கோத்திரங்களிலும் தெரிந்துகொள்ளும் ஸ்தானமாகிய அவருடைய வாசஸ்தலத்தையே நாடி, அங்கே போய், உபாகமம் 12:5

  • கண்ட இடமெல்லாம் நீ உன் சர்வாங்க தகனபலிகளை இடாதபடிக்கு எச்சரிக்கையாயிரு. உபாகமம் 12:13

• புதிய ஏற்பாட்டில் - சிலுவையில் கிறிஸ்துவின் தியாகம் - அவர் ஆலயத்தின் திரைகளைக் கிழித்தார், அதனால் பரிசுத்த ஸ்தலத்திற்கும் வெளிப்பிரகாரத்திற்கும் இடையேயான பிரிவினை யாவும் சிலுவையில் கிறிஸ்துவின் தியாகத்தால் அகற்றப்பட்டன. தேவன் ஆவியாய் நம்மில் வாழ்வதால், இனி ஆலயங்களில் மட்டுமே நாம் அவரை வணங்க பிரிந்திருக்க வேண்டியதில்லை - இயேசு, மறுபடியும் மகா சத்தமாய்க் கூப்பிட்டு, ஆவியை விட்டார். அப்பொழுது, தேவாலயத்தின் திரைச்சீலை மேல்தொடங்கிக் கீழ்வரைக்கும் இரண்டாகக் கிழிந்தது, பூமியும் அதிர்ந்தது, கன்மலைகளும் பிளந்தது. மத்தேயு 27:50-51

• தேவாலயத்தில் சிலை வடிவங்கள் எதுவும் வணங்கப்படக் கூடாது, தேவன் ஆவியாய் இருப்பதால், நாம் ஆவியின் மூலம் தொழுது கொள்கிறோம். இதற்கு நம்மை ஆயத்தப்படுத்துகிறவர் தேவனே; ஆவியென்னும் அச்சாரத்தை நமக்குத் தந்தவரும் அவரே. இந்தத் தேகத்தில் குடியிருக்கையில் கர்த்தரிடத்தில் குடியிராதவர்களாயிருக்கிறோமென்று அறிந்தும், எப்பொழுதும் தைரியமாயிருக்கிறோம். 2 கொரிந்தியர் 5:5,7

4. சரீர / பொருளாதார ஆசீர்வாதம் vs ஆவிக்குரிய ஆசீர்வாதம்

பழைய ஏற்பாட்டு ஆசீர்வாதம்

• ஆபிரகாமுக்கு உண்டாயிருந்த ஆசீர்வாதம் பெரும்பாலும் பொருளாதார ஆசீர்வாதமாக இருந்தது. கர்த்தர் என் எஜமானை மிகவும் ஆசீர்வதித்திருக்கிறார், அவர் சீமானாயிருக்கிறார்; கர்த்தர் அவருக்கு ஆடுமாடுகளையும், வெள்ளியையும், பொன்னையும், வேலைக்காரரையும், வேலைக்காரிகளையும், ஒட்டகங்களையும், கழுதைகளையும் கொடுத்திருக்கிறார். என் எஜமானுடைய மனைவியாகிய சாராள் முதிர்வயதானபோது, என் எஜமானுக்கு ஒரு குமாரனைப் பெற்றாள்; அவர் தமக்கு உண்டான யாவையும் அவனுக்குக் கொடுத்திருக்கிறார். ஆதியாகமம் 24:35-36

• யோபுக்கான ஆசீர்வாதம் - கர்த்தர் யோபின் முன்னிலைமையைப் பார்க்கிலும் அவன் பின்னிலைமையை ஆசீர்வதித்தார்; பதினாலாயிரம் ஆடுகளும், ஆறாயிரம் ஒட்டகங்களும், ஆயிரம் ஏர்மாடுகளும், ஆயிரம் கழுதைகளும் அவனுக்கு உண்டாயின. யோபு 42:12

புதிய ஏற்பாட்டு ஆசீர்வாதம்

• புதிய ஏற்பாட்டில், தேவனுடைய ராஜ்யத்தையும் அவருடைய நீதியையும் தேட வேண்டும் என்று வலியுறுத்தப்படுகிறது. மேலும், நாம் முதலாவது அவருடைய ராஜ்யத்தைத் தேடும்போது பூமிக்குரிய அனைத்து ஆசீர்வாதங்களும் நமக்கு வழங்கப்படும். முதலாவது தேவனுடைய ராஜ்யத்தையும் அவருடைய நீதியையும் தேடுங்கள், அப்பொழுது இவைகளெல்லாம் உங்களுக்குக்கூடக் கொடுக்கப்படும். மத்தேயு 6:33

• புதிய ஏற்பாட்டு ஆசீர்வாதம் என்பது நமக்கு ஆவிக்குரிய ஆசீர்வாதம் - பரிசுத்தம், புத்திர சுவீகாரம், கிருபை, மீட்பு, மன்னிப்பு, கிருபையின் ஐசுவரியங்கள், சுதந்தரம், இரட்சிப்பு, பரிசுத்த ஆவி போன்றவை. நம்முடைய கர்த்தராகிய இயேசுகிறிஸ்துவின் பிதாவாகிய தேவனுக்கு ஸ்தோத்திரம்; அவர் கிறிஸ்துவுக்குள் உன்னதங்களிலே ஆவிக்குரிய சகல ஆசீர்வாதத்தினாலும் நம்மை ஆசீர்வதித்திருக்கிறார். தமக்கு முன்பாக நாம் அன்பில் பரிசுத்தமுள்ளவர்களும் குற்றமில்லாதவர்களுமாயிருப்பதற்கு, அவர் உலகத்தோற்றத்துக்குமுன்னே கிறிஸ்துவுக்குள் நம்மைத் தெரிந்துகொண்டபடியே, பிரியமானவருக்குள் தாம் நமக்குத் தந்தருளின தம்முடைய கிருபையின் மகிமைக்குப் புகழ்ச்சியாக, தம்முடைய தயவுள்ள சித்தத்தின்படியே, நம்மை இயேசுகிறிஸ்து மூலமாய்த் தமக்குச் சுவிகாரபுத்திரராகும்படி முன்குறித்திருக்கிறார். அவருடைய கிருபையின் ஐசுவரியத்தின்படியே இவருடைய இரத்தத்தினாலே பாவமன்னிப்பாகிய மீட்பு இவருக்குள் நமக்கு உண்டாயிருக்கிறது. அந்தக் கிருபையை அவர் சகல ஞானத்தோடும் புத்தியோடும் எங்களிடத்தில் பெருகப்பண்ணினார். காலங்கள் நிறைவேறும்போது விளங்கும் நியமத்தின்படி பரலோகத்திலிருக்கிறவைகளும் பூலோகத்திலிருக்கிறவைகளுமாகிய சகலமும் கிறிஸ்துவுக்குள்ளே கூட்டப்படவேண்டுமென்று, தமக்குள்ளே தீர்மானித்திருந்த தம்முடைய தயவுள்ள சித்தத்தின் இரகசியத்தை எங்களுக்கு அறிவித்தார். எபேசியர் 1:3-10

5. தசமபாகம் vs அந்தரங்கமாகக் கொடுப்பது

• பழைய ஏற்பாடு - நியாயப்பிரமாணத்தின்படி ஒருவர் சம்பாதிப்பதில் பத்தில் ஒரு பகுதி (1/10) கொடுக்க வேண்டும். நீ உன் தேவனாகிய கர்த்தருக்கு எப்பொழுதும் பயந்திருக்கப் பழகும்படிக்கு, வருஷந்தோறும் நீ விதைக்கிற விதைப்பினாலே வயலில் விளையும் எல்லாப் பலனிலும் தசமபாகத்தைப் பிரித்து, உபாகமம் 14:22

• புதிய ஏற்பாடு - கொடுப்பது என்பது நீங்கள் மனதில் தீர்மானிப்பதை அடிப்படையாகக் கொண்டது. வற்புறுத்தலால் கொடுக்கக் கூடாது, அந்தரங்கமாகக் கொடுக்கப்பட வேண்டும்.

  • அவனவன் விசனமாயுமல்ல, கட்டாயமாயுமல்ல, தன் மனதில் நியமித்தபடியே கொடுக்கக்கடவன்; உற்சாகமாய்க் கொடுக்கிறவனிடத்தில் தேவன் பிரியமாயிருக்கிறார். 2 கொரிந்தியர் 9:7

  • நீயோ தர்மஞ்செய்யும்போது, உன் தர்மம் அந்தரங்கமாயிருப்பதற்கு, உன் வலதுகை செய்கிறதை உன் இடதுகை அறியாதிருக்கக்கடவது. அப்பொழுது அந்தரங்கத்தில் பார்க்கிற உன் பிதா தாமே உனக்கு வெளியரங்கமாய்ப் பலனளிப்பார். மத்தேயு 6:3-4

புதிய ஏற்பாட்டில், பழைய ஏற்பாட்டு நாட்களில் செய்யப்பட்டதைப் போல, ஒரு வருடத்தின் அல்லது ஒரு மாதத்தின் சிறப்பு நாட்களைக் கடைப்பிடிக்கும் விதிகளுக்கான மதிப்பு இல்லாமல் போய்விட்டது. நீங்கள் தேவனை அறியாமலிருந்தபோது, சுபாவத்தின்படி தேவர்களல்லாதவர்களுக்கு அடிமைகளாயிருந்தீர்கள். இப்பொழுதோ நீங்கள் தேவனை அறிந்திருக்க அல்லது தேவனாலே அறியப்பட்டிருக்க, பெலனற்றதும் வெறுமையானதுமான அவ்வழிபாடுகளுக்கு நீங்கள் மறுபடியும் திரும்பி, மறுபடியும் அவைகளுக்கு அடிமைப்படும்படி விரும்புகிறதெப்படி? நாட்களையும், மாதங்களையும், காலங்களையும், வருஷங்களையும் பார்க்கிறீர்களே. நான் உங்களுக்காகப் பிரயாசப்பட்டது வீணாய்ப்போயிற்றோ என்று உங்களைக்குறித்துப் பயந்திருக்கிறேன். கலாத்தியர் 4:8-11

நீங்கள் கிறிஸ்துவில் மீண்டும் பிறக்கும்போது, புதியது முதன்மை பெற்று, பழையவைகள் ஒழிந்து போயின. இப்படியிருக்க, ஒருவன் கிறிஸ்துவுக்குள்ளிருந்தால் புதுசிருஷ்டியாயிருக்கிறான்; பழையவைகள் ஒழிந்து போயின, எல்லாம் புதிதாயின. 2 கொரிந்தியர் 5:17

வேதத்தை எவ்வாறு தியானிப்பது ?

மக்கள் வேதத்தைப் படிக்கிறார்கள், ஆனால் வேதத்தை தியானிப்பது அழிந்து வருகிறது. இரவும் பகலும் தியானிக்க வேதாகமம் நம்மை அழைக்கிறது.

• யோசுவா 1:8 - இந்த நியாயப்பிரமாண புஸ்தகம் உன் வாயைவிட்டுப் பிரியாதிருப்பதாக; இதில் எழுதியிருக்கிறவைகளின்படியெல்லாம் நீ செய்யக் கவனமாயிருக்கும்படி, இரவும் பகலும் அதைத் தியானித்துக் கொண்டிருப்பாயாக; அப்பொழுது நீ உன் வழியை வாய்க்கப்பண்ணுவாய், அப்பொழுது புத்திமானாயும் நடந்துகொள்ளுவாய்.

• சங்கீதம் 1:2 - கர்த்தருடைய வேதத்தில் பிரியமாயிருந்து, இரவும் பகலும் அவருடைய வேதத்தில் தியானமாயிருக்கிற மனுஷன் பாக்கியவான்.

வேதத்தில் ஒரு பத்தியைப் படிக்கும் போது, அது என்ன சொல்கிறது என்பதை அறிந்து கொள்வது மட்டும் போதாது, அதன் அர்த்தம் என்ன என்பதையும் நாம் புரிந்து கொள்ள வேண்டும். இங்குதான் தியானம் இன்றியமையாதது.

தியானிப்பதைக் குறித்து தெரிந்து கொள்ள வேண்டிய விஷயங்கள்

1. வேதத்தை மெதுவாக, திரும்பத் திரும்ப படித்து, வார்த்தைக்கு வார்த்தை புரிந்துகொள்வதை உள்ளடக்கியது தான் தியானம். நாம் புரிந்துகொள்வதற்கு ஆர்வம் காட்டும்போது, நம் சொந்த ஞானத்தால் புரிந்துகொள்ள முடியாத வசனத்தின் உள் அர்த்தத்தை வெளிப்படுத்த தேவனின் ஆவியானவர் நமக்கு உதவுவார்.

2. பல கிறிஸ்தவர்கள் தங்களுக்குப் பிடித்த வசனங்கள், பத்திகள் அல்லது புத்தகங்களை மட்டுமே தியானிக்கிறார்கள். நாம் முழு வேதத்தையும் படிப்பதற்கு அழைக்கப்பட்டிருக்கிறோம், ஏனெனில் வேதம் நமக்கு புதியதைக் கற்பிக்கவும், நமது தவறான நடத்தையைக் கண்டிக்கவும், நமது நடைகளை சரிசெய்யவும், சரியான வழியில் செல்லவும் உதவுகிறது. வேதவாக்கியங்களெல்லாம் தேவ ஆவியினால் அருளப்பட்டிருக்கிறது; தேவனுடைய மனுஷன் தேறினவனாகவும், எந்த நற்கிரியையுஞ்செய்யத் தகுதியுள்ளவனாகவும் இருக்கும்படியாக, அவைகள் உபதேசத்துக்கும், கடிந்துகொள்ளுதலுக்கும், சீர்திருத்தலுக்கும், நீதியைப் படிப்பிக்குதலுக்கும் பிரயோஜனமுள்ளவைகளாயிருக்கிறது. 2 தீமோத்தேயு 3:16-17

3. பழைய ஏற்பாடும் புதிய ஏற்பாடும் தேவனின் இரண்டு "உதடுகள்". எனவே பழைய ஏற்பாடு மற்றும் புதிய ஏற்பாடு ஆகிய இரண்டிலும் இருந்து தெரிந்து கொள்வது முக்கியம்.

4. வேதத்தில் தேவையில்லாதது என்று எதுவும் இல்லை. ஒவ்வொரு காற்புள்ளி, முற்றுப்புள்ளி மற்றும் ஒவ்வொரு வார்த்தைக்கும் ஒரு அர்த்தம் உள்ளது - தேவவசனத்தினால் உண்டாகும் பொறுமையினாலும் ஆறுதலினாலும் நாம் நம்பிக்கையுள்ளவர்களாகும்படிக்கு, முன்பு எழுதியிருக்கிறவைகளெல்லாம் நமக்குப் போதனையாக எழுதியிருக்கிறது. ரோமர் 15:4

5. இந்தக் கணினி யுகத்தில் நமக்கு எல்லாமே வேகமாகத் தேவைப்படுகிறது. வழக்கமானவைகள் எல்லாவற்றையும் காலாவதியானவைகளாகப் பார்க்கிறோம். தியானிப்பதில் வேகமான குறுக்குவழிகள் இல்லை, "அறிவை" பெறுவது வேகமாக இருக்கும்; ஆனால் தேவனிடமிருந்து "செய்தி" பெறுவதற்கு நேரம் எடுக்கும். எனவே நீங்கள் தேவனிடமிருந்து கற்றுக்கொள்ள நேரத்தை ஒதுக்க வேண்டும்.

6. வேதத்தைத் தியானிப்பது என்பது அதை வாசிப்பது மட்டுமல்ல - நீங்கள் "கேட்கும் வரை" படிக்க வேண்டும். எனவே தேவன் உங்களிடம் என்ன பேசுகிறார் என்பதைக் கேட்க உங்கள் காதுகள் / கண்கள் மற்றும் மனம் வசனத்திற்குள் இருக்க வேண்டும்.

7. உதவி மூலம் புரிந்து கொள்வதற்கான குறிப்புகளைத் தேட சோம்பேறியாக இருக்காதீர்கள், நீங்கள் இருக்கும் இடத்தில் நிறுத்தாதீர்கள். தேவனின் ஞானம் கடற்கரை மணல் போன்றது, நீங்கள் இன்று செய்வதோடு நிறுத்த முடியாது, அது கடைசி மூச்சு வரை இருக்க வேண்டும். அதன் பிறகு நித்தியத்தில், நாம் புரிந்து கொள்ள முடியாத பல விஷயங்களை அவர் நமக்கு வெளிப்படுத்துவார்.

8. வேதம் இயற்கைக்கு அப்பாற்பட்ட புத்தகம், தெய்வீக புத்தகத்தை தெய்வீக உதவி இல்லாமல் புரிந்து கொள்ள முடியாது. எனவே, கற்றறிந்த பேராசிரியர்களைப் போல் அறிவுக்காகக் கற்றுக்கொள்வதற்கு வேதத்தை அணுக முயற்சிக்காதீர்கள். குழந்தை போன்ற மனப்பான்மையை அவர் நம்மிடம் எதிர்பார்க்கிறார்.

9. வாசிக்கும் பகுதியின் சூழலைப் புறக்கணிக்காதீர்கள், 5 'W's உடன் புரிந்து கொள்ளுங்கள்.

   1. (WHO) யார் சொன்னது?

   2. (WHOM) யாருக்காக அல்லது யாரைப் பற்றி சொல்லப்பட்டது?

   3. (WHEN) அது எப்போது சொல்லப்பட்டது?

   4. (WHERE) எங்கே சொல்லப்பட்டது?

   5. (WHY) அது ஏன் சொல்லப்பட்டது?

10. நீங்கள் தேவனுடைய வார்த்தையை தியானிக்கும்போது, அவர் உங்களிடம் கீழ்ப்படியும்படி கேட்கும் விஷயங்கள் உள்ளன, தாமதமாக கீழ்ப்படிதல் பல ஆசீர்வாதங்களை இழக்க வழிவகுக்கிறது.

வெற்றிகரமான வேத தியானிப்பிற்கான நடைமுறை குறிப்புகள்.

1. வேதம் முழுவதையும் வருடத்திற்கு ஒருமுறை அல்லது இரண்டு முறை படிக்கவும். நான் வருடத்திற்கு ஒரு முறை செய்ய முயற்சிக்கிறேன். வேத வாசிப்பு நாட்காட்டிகளைப் (காலண்டர்) பயன்படுத்துங்கள். "https://odb.org/" - இது நல்ல குறிப்புகள் கொண்ட ஒரு இணையதளம். உங்களுக்கு ஏற்ற எந்த காலண்டரையும் நீங்கள் பயன்படுத்திக் கொள்ளலாம்.

2. பல கடினமான வசனங்கள் உங்களுக்குப் புரியவில்லை என்றால் கவலைப்பட வேண்டாம்.

   1. முதல் வாசிப்பின் கேள்விக்குறிகள் அடுத்தடுத்த வாசிப்புகளில் ஆச்சரியக்குறிகளாக மாறும்.

   2. மற்ற பாடப்புத்தகங்களைப் போலல்லாமல், வேதம் எல்லா வயதினருக்கும் எல்லா ஆவிக்குரிய நிலைகளுக்கும் ஒரே மாதிரியாக இருக்கிறது. எனவே முதல் நிகழ்விலேயே நீங்கள் எல்லாவற்றையும் புரிந்து கொள்ள மாட்டீர்கள். இது வாழ்நாள் முழுவதுக்குமானது!

   3. வேதத்தின் எந்தப் பகுதியையாவது நாம் அலட்சியப்படுத்தினால், “பாதி வெந்த” அப்பத்தைப் போல இருப்போம்! (ஓசியா 7:8)

   4. பூமியில் நாம் புரிந்து கொள்ளாதது நித்தியத்தில் புரிந்து கொள்ளப்படும் (1 கொரி 13:9-12).

3. வேதத்தைத் தியானிப்பதற்கு என்று ஒரு நேரத்தை ஒதுக்கிக் கொள்ளுங்கள். அந்த நேரத்தை எதற்கும் சமரசம் செய்யாதீர்கள் (அவசர வேலையாயிருந்தாலும் கூட). நான் பொதுவாக தியானிப்பதற்கு காலையில் நேரத்தை அமைத்துக்கொள்கிறேன். வெளியூர் செல்ல வேண்டியிருந்தால், புறப்படுவதற்கு முன்பாக, தியானிப்பதற்காக சீக்கிரம் எழுந்துவிடுவேன். தியானிக்காமல் இருப்பதற்கு பயணத்தை ஒரு காரணமாக எடுத்துக் கொள்ளாதீர்கள். தியானத்தை உங்கள் நாளுக்கான ஆக்ஸிஜன் என்று நினைத்துக் கொள்ளுங்கள். ஒரு நாளைத் தொடங்கும் முன் உங்களுக்கு போதுமான ஆக்ஸிஜன் கிடைப்பதை உறுதிசெய்யவும்.

4. ஆரம்பத்தில் வசனத்தைத் தியானிப்பது குறைந்தபட்சம் 30 நிமிடங்களில் இருந்து தொடங்கும், நீங்கள் ஒருமுறை தேவன் நல்லவர், தேனை விட இனிமையானவர் என்று ருசித்த பின் இந்த நேரம் மேலும் மேலும் அதிகரிக்க வேண்டும். நீங்கள் வளரும்போது தேவன் தம்முடைய ஞானத்தினாலும் வெளிப்பாட்டினாலும் உங்களைப் பலப்படுத்துவார்.

5. தேவனுடைய வார்த்தையை தியானித்துவிட்டு, ஜெபத்தை புறக்கணிக்காதீர்கள். சிலர் வேதம் படிப்பதற்கு நிறைய நேரம் செலவிடுகிறார்கள், ஆனால் ஜெபத்தில் மிகக் குறைந்த நேரத்தையே செலவிடுகிறார்கள்; சிலர், ஜெபத்தில் அதிக நேரம் செலவிடுகிறார்கள், ஆனால் வேதம் படிப்பதற்கு மிகக் குறைந்த நேரத்தையே செலவிடுகிறார்கள். இரண்டும் தவிர்க்கப்பட வேண்டும். ஆரோக்கியமான சமநிலை இருக்க வேண்டும்.

6. நீங்கள் புரிந்துகொண்டதை எழுதுவதற்கு வேத தியானத்திற்கென்று பிரத்யேக நோட்டு வைத்துக் கொள்ளுங்கள் (கற்றுக்கொண்டதை எழுதுங்கள்). எனது அனுபவம் - ஒவ்வொரு நாளும் நான் என்ன செய்கிறேனோ அதை வழக்கமாகக் குறித்து வைத்துக் கொள்வேன். மாதத்தின் இறுதியில் நான் கற்றுக்கொண்டதைத் திரும்பிப் பார்த்து, மாதம் முழுவதுமான தேவனின் வழிகாட்டுதலுக்கு நன்றி செலுத்துவேன். இது எனக்கு அறிவில் வளரவும் அவரது கிருபை மற்றும் இரக்கத்திற்காக நன்றியுள்ள இதயத்தை உருவாக்கவும் எனக்கு உதவியது. வருடங்கள் கடந்து, திரும்பிப் பார்க்கும் பொழுது, எப்படி குழந்தையாக இருந்தீர்கள், எப்படி தேவனிடம் இருந்து அதிக மாமிச உணவை உண்ணும் அளவிற்கு முதிர்ச்சியடைந்து இருக்கிறீர்கள் என்று காணலாம்.