ஆவிக்குரிய கவனச்சிதறல்களை மேற்கொள்ளுதல்

நீங்கள் மணிக்கு 100 கிமீ வேகத்தில் வாகனம் ஓட்டும்போது, திடீரென்று காரில் ஒரு வித்தியாசமான ஒலியைக் கேட்கும்போது, உங்கள் கவனம் சாலையிலிருந்து அந்த சத்தத்திற்கு மாறுகிறது. டயரில் ஏதாவது சிக்கல் உள்ளதா? அல்லது வேறு ஏதாவது சிக்கலா? என்று எண்ணங்கள் ஒடத் தொடங்குகின்றன. இந்த கவனச்சிதறல் வாகனம் ஓட்டுவதில் கவனம் செலுத்துவதிலிருந்து உங்களை இழுக்கிறது. அதேபோல், கிறிஸ்துவுடனான நமது ஆவிக்குரிய நடையில், எதிரியான சாத்தான், நம் பாதையில் கவனச்சிதறல்களை அனுப்புவதன் மூலம் நமது வளர்ச்சியைத் தடுக்க முயற்சிக்கிறான். இந்த கவனச்சிதறல்கள் நம்மை இடைநிறுத்த அல்லது ஆவிக்குரிய ரீதியில் மெதுவாக்க காரணமாகின்றன. இந்த தருணங்களில், சாத்தான் நமது விசுவாசத்தை பலவீனப்படுத்தவும், நமது ஜெப வாழ்க்கையை சீர்குலைக்கவும், தியான நேரத்தை குறைக்கவும், தேவனிடமிருந்து நம்மை தூரப்படுத்தவும், நம்மை மீண்டும் பிரச்சினைகளுக்குள் இழுக்கவும், கிறிஸ்துவிடம் திரும்புவதைத் தடுக்கவும் முயற்சிக்கிறான். மெதுவாக நாம் ஒரு குறிப்பிட்ட காலப்பகுதியில் பின்வாங்குபவர்களாக மாறுகிறோம்.

ஆரம்பகால திருச்சபை எண்ணிக்கையில் வளர்ந்தபோது இதே போன்ற சவால்களை எதிர்கொண்டது. அவர்கள் எதிர்கொண்ட கவனச்சிதறல்களையும் தடைகளையும் எவ்வாறு சமாளித்தார்கள் என்பதிலிருந்து நாம் கற்றுக்கொள்ளலாம். இந்த உதாரணம் ஆரம்பகால திருச்சபைக்கு மட்டும் பொருந்தாது - இது நம் தனிப்பட்ட வாழ்க்கைக்கும் பொருந்தும். அவர்களுடைய அனுபவத்தை சிந்திப்பதன் மூலம், நமது சொந்த ஆவிக்குரிய பயணங்களில் இதே போன்ற சவால்களை நாம் அடையாளம் கண்டு, அவற்றை மேற்கொள்ள வழிகளைக் கண்டறிந்து எழுப்புதலை அனுபவிக்க முடியும்.

ஆதி திருச்சபையின் சூழல்

இயேசு சிலுவையில் அறையப்பட்டு, ஜெயம் கொண்ட பிறகு, அவர் மீண்டும் உயிர்த்தெழுந்து, மகதலேனா மரியாளுக்கும் அவருடைய சீடர்களில் பலருக்கும் தோன்றி, அவர்களின் விசுவாசத்தை வலுப்படுத்தினார். அவர் அவர்களுக்கு மகத்தான கட்டளையைக் கொடுத்து பரலோகத்திற்கு ஏறிப்போனார். லூக்கா 24:50-52. தம்முடைய கட்டளையை நிறைவேற்றுவதற்கு, அவர்களுக்கு அதிகாரம் அளிக்கவும் அவர்களை உயிர்ப்பிக்கவும் பரிசுத்த ஆவியை அனுப்புவதாக வாக்குத்தத்தம் பண்ணினார். ஆகையால், நீங்கள் புறப்பட்டுப்போய், சகல ஜாதிகளையும் சீஷராக்கி, பிதா குமாரன் பரிசுத்த ஆவியின் நாமத்திலே அவர்களுக்கு ஞானஸ்நானங்கொடுத்து, நான் உங்களுக்குக் கட்டளையிட்ட யாவையும் அவர்கள் கைக்கொள்ளும்படி அவர்களுக்கு உபதேசம்பண்ணுங்கள். இதோ, உலகத்தின் முடிவுபரியந்தம் சகல நாட்களிலும் நான் உங்களுடனேகூட இருக்கிறேன் என்றார். ஆமென். மத்தேயு 28:19-20

அவர் பரலோகத்திற்கு ஏறிச்சென்ற பிறகு, சீஷர்கள் தவறாமல் சந்தித்து, தேவனுடைய வார்த்தைகள் நிறைவேற வேண்டும் என்று இடைவிடாமல்  ஜெபித்தனர். அங்கே இவர்களெல்லாரும், ஸ்திரீகளோடும் இயேசுவின் தாயாகிய மரியாளோடும், அவருடைய சகோதரரோடுங்கூட ஒருமனப்பட்டு, ஜெபத்திலும் வேண்டுதலிலும் தரித்திருந்தார்கள். அந்நாட்களிலே, சீஷர்களில் ஏறக்குறைய நூற்றிருபதுபேர் கூடியிருந்தபோது, அவர்கள் நடுவிலே பேதுரு எழுந்து நின்று: சகோதரரே, இயேசுவைப் பிடித்தவர்களுக்கு வழிகாட்டின யூதாசைக்குறித்துப் பரிசுத்த ஆவி தாவீதின் வாக்கினால் முன் சொன்ன வேதவாக்கியம் நிறைவேறவேண்டியதாயிருந்தது. அப்போஸ்தலர் 1:14-16

பெந்தெகொஸ்தே என்னும் நாள் வந்தபோது, அவர்களெல்லாரும் ஒருமனப்பட்டு ஓரிடத்திலே வந்திருந்தார்கள். அப்பொழுது அவர்கள் பரிசுத்த ஆவியினாலே நிரப்பப்பட்டு, வெவ்வேறு அந்நியபாஷைகளில் பேசினார்கள். அப்போஸ்தலர் 2:1-12. அந்த தருணத்திலிருந்து, "வழி" என்று அழைக்கப்படும் இயேசுவின் சீடர்கள் எண்ணிக்கையில் வளரத் தொடங்கினர். ஒவ்வொரு நாளும், அவர்கள் உபதேசம், ஐக்கியம், அப்பம் பிட்குதல், ஜெபம் ஆகியவற்றில் தங்களை அர்ப்பணித்தனர்.

அவர்கள் அப்போஸ்தலருடைய உபதேசத்திலும், அந்நியோந்நியத்திலும், அப்பம் பிட்குதலிலும், ஜெபம்பண்ணுதலிலும் உறுதியாய்த் தரித்திருந்தார்கள். எல்லாருக்கும் பயமுண்டாயிற்று. அப்போஸ்தலர்களாலே அநேக அற்புதங்களும் அடையாளங்களும் செய்யப்பட்டது. விசுவாசிகளெல்லாரும் ஒருமித்திருந்து, சகலத்தையும் பொதுவாய் வைத்து அநுபவித்தார்கள். காணியாட்சிகளையும் ஆஸ்திகளையும் விற்று, ஒவ்வொருவனுக்கும் தேவையானதற்குத்தக்கதாக அவைகளில் எல்லாருக்கும் பகிர்ந்துகொடுத்தார்கள். அவர்கள் ஒருமனப்பட்டவர்களாய் தேவாலயத்திலே அனுதினமும் தரித்திருந்து, வீடுகள்தோறும் அப்பம்பிட்டு மகிழ்ச்சியோடும் கபடமில்லாத இருதயத்தோடும் போஜனம்பண்ணி, தேவனைத் துதித்து, ஜனங்களெல்லாரிடத்திலும் தயவுபெற்றிருந்தார்கள். இரட்சிக்கப்படுகிறவர்களைக் கர்த்தர் அனுதினமும் சபையிலே சேர்த்துக்கொண்டுவந்தார். அப்போஸ்தலர் 2:42-47

அவர்கள் ஆழ்ந்த ஆவிக்குரியவர்களாகவும், கீழ்ப்படிதலுள்ளவர்களாகவும் இருந்தார்கள், கர்த்தர் அவர்களிடம் ஒப்படைத்த பெரிய கட்டளையை உண்மையுடன் நிறைவேற்றினார்கள்.

ஆதி திருச்சபையின் சவால்

அந்நாட்களிலே, சீஷர்கள் பெருகினபோது, கிரேக்கரானவர்கள், தங்கள் விதவைகள் அன்றாடக விசாரணையில் திட்டமாய் விசாரிக்கப்படவில்லையென்று, எபிரெயருக்கு விரோதமாய் முறுமுறுத்தார்கள். அப்போஸ்தலர் 6:1

ஆரம்பகால திருச்சபை வளர்ந்தபோது, யூதர்களில் இரண்டு தனித்துவமான குழுக்கள் இருந்தன.

• கிரேக்க யூதர்கள் - இவர்கள் கிரேக்க பின்னணி கொண்ட யூதர்கள்.

• எபிரெய யூதர்கள் - இவர்கள் அராமிக் பின்னணி கொண்ட யூதர்கள். பாலஸ்தீனிய யூதர்கள் என்று குறிப்பிடப்படும் எபிரெய யூதர்கள், எப்போதும் முற்பிதாக்களின் தேசத்தில் வாழ்ந்ததாலும், தங்கள் மூதாதையரின் அதே மொழியைப் பேசியதாலும், தங்கள் பாரம்பரியத்தில் பெருமிதம் கொண்டனர். அவர்களும் சபைக்கு அருகிலேயே இருந்ததால் அங்கு வழிபாடு செய்து வந்தனர்.

எபிரெய யூதர்கள் தங்களுடைய விதவைகளை அன்றாடக விசாரணையில் திட்டமாய் விசாரிக்கவில்லையென்று, கிரேக்கரானவர்கள் சீஷர்களிடம் முறையிட்டபோது ஒரு சவால் எழுந்தது.

ஆதித் திருச்சபையின் நிலை

இந்த சவால்களை அவர்கள் எதிர்கொண்டபோது, அவற்றின் ஆவிக்குரிய ஆழத்தைப் புரிந்துகொள்ள, ஆரம்பகால திருச்சபையின் நிலையை உன்னிப்பாக ஆராய்வது முக்கியம். தேவாலயத்தின் நிலை மற்றும் சம்பந்தப்பட்ட மக்கள் பற்றிய தெளிவான புரிதல் இல்லாமல், பல முக்கியமான விவரங்கள் தவறவிடப்படலாம்.

1. தேவன் முதல் நிலை / உலகம் இரண்டாம் நிலை சபை - விசுவாசிகளாகிய திரளான கூட்டத்தார் ஒரே இருதயமும் ஒரே மனமுமுள்ளவர்களாயிருந்தார்கள். ஒருவனாகிலும் தனக்குள்ளவைகளில் ஒன்றையும் தன்னுடையதென்று சொல்லவில்லை; சகலமும் அவர்களுக்குப் பொதுவாயிருந்தது. கர்த்தராகிய இயேசுவின் உயிர்த்தெழுதலைக்குறித்து அப்போஸ்தலர்கள் மிகுந்த பலமாய்ச் சாட்சிகொடுத்தார்கள்; அவர்களெல்லார்மேலும் பூரணகிருபை உண்டாயிருந்தது. நிலங்களையும் வீடுகளையும் உடையவர்கள் அவைகளை விற்று, விற்கப்பட்டவைகளின் கிரயத்தைக் கொண்டுவந்து, அப்போஸ்தலருடைய பாதத்திலே வைத்தார்கள். அவனவனுக்குத் தேவையானதற்குத்தக்கதாய்ப் பகிர்ந்துகொடுக்கப்பட்டது; அவர்களில் ஒருவனுக்கும் ஒன்றும் குறைவாயிருந்ததில்லை. அப்போஸ்தலர் 4:32-35

• இருதயத்திலும் மனதிலும் ஒன்றுபட்டிருந்தனர் - எல்லா விசுவாசிகளும் தங்கள் கவனத்தில் ஒன்றுபட்டு, தேவனை முதலாவதாகவும், உலக கவலைகளை இரண்டாவதாகவும் வைத்து, கிறிஸ்துவை முழுமையாக சார்ந்திருந்தனர்.

• எல்லாவற்றையும் பகிர்ந்து கொண்டனர் - அவர்கள் தங்களுடைய உடைமைகளைத் தங்களுடையதாக கருதாமல், கர்த்தருடையதாகவே கருதி, சக விசுவாசிகளோடு தாராளமாகப் பகிர்ந்துகொண்டார்கள்.

• திருச்சபையின் பணி – அப்போஸ்தலர்கள், இயேசுவின் உயிர்த்தெழுதலுக்கு தொடர்ந்து வல்லமையாக சாட்சியமளித்து, அதிக விசுவாசிகளை சபைக்குள் கொண்டு வருவதன் மூலம் தேவனுடைய கட்டளையை நிறைவேற்றினர்.

• தேவ கிருபை - தேவனுடைய கிருபை சபையில் ஏராளமாக இருந்தது, இந்த சத்தியம் இன்றும் அப்படியே உள்ளது.

• பணம் அவர்கள் காலடியில் இருந்தது - திருச்சபை பணத்தை இரண்டாம் பட்சமாக கருதியது. நிலங்களையும் வீடுகளையும் வைத்திருந்தவர்கள் அவற்றை விற்று, அதன் மூலம் கிடைத்த தொகையை அப்போஸ்தலர்களின் பாதத்தில் வைத்தார்கள்.

  • நிலங்களையும் வீடுகளையும் உடையவர்கள் அவைகளை விற்று, விற்கப்பட்டவைகளின் கிரயத்தைக் கொண்டுவந்து, அப்போஸ்தலருடைய பாதத்திலே வைத்தார்கள். அவனவனுக்குத் தேவையானதற்குத்தக்கதாய்ப் பகிர்ந்துகொடுக்கப்பட்டது; அவர்களில் ஒருவனுக்கும் ஒன்றும் குறைவாயிருந்ததில்லை. அப்போஸ்தலர் 4:34-35

  • தனக்கு உண்டாயிருந்த நிலத்தை விற்று, அதின் கிரயத்தைக் கொண்டு வந்து, அப்போஸ்தலருடைய பாதத்திலே வைத்தான். அப்போஸ்தலர் 4:37

• ஒருவனுக்கும் ஒன்றும் குறைவாயிருந்ததில்லை - அவர்களில் தேவையுள்ளவர்கள் யாரும் இல்லை. தேவன் கொடுத்ததைக் கொண்டு திருப்தி அடைந்தார்கள். யாரும் பொருள் ஆதாயத்திற்காக சபையில் சேரவில்லை.

2. சபை நாள்தோறும் வளர்ந்தது - தினந்தோறும் தேவாலயத்திலேயும் வீடுகளிலேயும் இடைவிடாமல் உபதேசம்பண்ணி, இயேசுவே கிறிஸ்துவென்று பிரசங்கித்தார்கள். அப்போஸ்தலர் 5:42

• ஆரம்பகால திருச்சபை ஆலயங்களிலும், வீடு வீடாக சென்றும் (வீட்டு சபை என்றும் அழைக்கலாம்) இயேசுவே மேசியா என்ற நற்செய்தியை தொடர்ந்து கற்பிப்பதற்கும் அறிவிப்பதற்கும் அர்ப்பணிக்கப்பட்டது.

• சுவிசேஷத்தைப் பரப்புவதில் இருந்த அவர்களின் கவனம் ஒருபோதும் அசையவில்லை. இதன் விளைவாக, அவர்கள் சீராக வளர்ந்து,அதிகமான மக்களை கிறிஸ்துவிடம் கொண்டு வந்தனர். நற்செய்தி மகிழ்ச்சியின்  நதிகளைப் போல பரவி, ஒவ்வொரு நாளும் நிறைய ஜீவன்களைத் தொட்டது.

3. இந்த சபையின் மீதான சாத்தானின் வேலை

• அனனியாவும் சப்பீராளும் - "பணத்தின் ஆவிˮ / "பேராசையின் ஆவி" / “பொய்களின் ஆவி” / "பாசாங்குத்தனத்தின் ஆவி".

  • பணம் என்பது அப்போஸ்தலர்களின் பாதத்தில் தாழ்மையுடன் செலுத்தப்பட வேண்டிய ஒன்று என்று ஆதி திருச்சபை கருதியதற்கு மாறாக (பர்னபா தனக்கு உண்டாயிருந்த நிலத்தை விற்று, அதின் கிரயத்தைக் கொண்டு வந்து கொடுத்தார் - அப்போஸ்தலர் 4:36-37), அனனியாவும் சப்பீராளும் பேராசையையும் நேர்மையின்மையையும் காட்டினர்.

  • சீப்புருதீவானும் லேவியனும் அப்போஸ்தலராலே ஆறுதலின் மகன் என்று அர்த்தங்கொள்ளும் பர்னபா என்னும் மறுபேர்பெற்றவனுமாகிய யோசே என்பவன், தனக்கு உண்டாயிருந்த நிலத்தை விற்று, அதின் கிரயத்தைக் கொண்டு வந்து,அப்போஸ்தலருடைய பாதத்திலே வைத்தான். அப்போஸ்தலர் 4:36-37

  • அப்போஸ்தலர் 5:1-2 வசனங்கள், அவர்கள் ஒரு சொத்தை விற்றதாகவும், ஆனால் முழு உடன்பாட்டுடன், அனனியா பணத்தின் ஒரு பகுதியை தனக்காக வைத்துக் கொண்டதாகவும், ஒரு பகுதியை மட்டுமே அப்போஸ்தலர்களின் பாதங்களுக்கு கொண்டு வந்ததாகவும் கூறுகிறது.

  • அனனியா என்னும் பேருள்ள ஒருவனும், அவனுடைய மனைவியாகிய சப்பீராளும் தங்கள் காணியாட்சியை விற்றார்கள். தன் மனைவி அறிய அவன் கிரயத்திலே ஒரு பங்கை வஞ்சித்துவைத்து, ஒரு பங்கைக் கொண்டுவந்து, அப்போஸ்தலருடைய பாதத்திலே வைத்தான். அப்போஸ்தலர் 5:1-2

  • பணத்தின் ஒரு பகுதியை நிறுத்தி வைத்ததன் மூலம், அவர்கள் தங்கள் காணிக்கை தேவனுக்கு என்று அடையாளம் காணத் தவறிவிட்டனர்.  அங்கு பரிசுத்த ஆவியானவர் தேவாலயத்தில் தீவிரமாக இருந்தார். பரிசுத்த ஆவியானவரிடம் பொய் சொன்னதற்காக அவர்கள் நியாயந்தீர்க்கப்பட்டதால், அவர்களின் வஞ்சகம் அவர்களின் மரணத்திற்கு வழிவகுத்தது.

• "பொறாமையின் ஆவி" - திருச்சபை வளர்ச்சியின் மீது பொறாமை உண்டானது - "அப்பொழுது பிரதான ஆசாரியனும் அவனுடனேகூட இருந்த சதுசேய சமயத்தாரனைவரும் எழும்பி, பொறாமையினால் நிறைந்து" அப்போஸ்தலர் 5:17

• சாத்தானின் தாக்கத்தால் சதுசேயர்கள், ஆதி திருச்சபையின் விரைவான வளர்ச்சியையும் வெற்றியையும் கண்டு பொறாமையால் எரிந்தனர்.

• “ஆசைகளின் ஆவி - பெருந்தீனிˮ - உணவு பற்றிய புகார் - அந்நாட்களிலே, சீஷர்கள் பெருகினபோது, கிரேக்கரானவர்கள், தங்கள் விதவைகள் அன்றாடக விசாரணையில் திட்டமாய் விசாரிக்கப்படவில்லையென்று, எபிரெயருக்கு விரோதமாய் முறுமுறுத்தார்கள். அப்போஸ்தலர் 6:1

  • ஒரு காலத்தில் திருப்தியாக இருந்த சபை உணவைப் பற்றிய கவலைகளால் திசைதிருப்பப்பட்டது. சாத்தான் அவர்களுடைய சரீர இச்சைகளை, குறிப்பாக பசியை, "இச்சைகளின் ஆவியை (பெருந்தீனி)" வளர்ப்பதற்கு ஒரு கருவியாகப் பயன்படுத்தினான்.

  • பெருந்தீனி பற்றிய விவாதத்தை பவுல் குறிப்பிடுகிறார், நம் வயிறு நம்மை கட்டுப்படுத்த அனுமதித்து, நம்முடைய பசிகளுக்கும் ஆசைகளுக்கும் நாம் எவ்வாறு கைதிகளாகிறோம் என்பதை கோடிட்டுக் காட்டுகிறார். அவர்களுடைய முடிவு அழிவு, அவர்களுடைய தேவன் வயிறு, அவர்களுடைய மகிமை அவர்களுடைய இலச்சையே, அவர்கள் பூமிக்கடுத்தவைகளைச் சிந்திக்கிறார்கள். பிலிப்பியர் 3:19

  • இந்த பிரச்சினை திருச்சபையின் வளர்ச்சியைத் தடுத்தது, பன்னிரண்டு பேரும் சீடர்களைக் கூடிவரச் செய்தனர். அப்பொழுது பன்னிருவரும் சீஷர் கூட்டத்தை வரவழைத்து: நாங்கள் தேவவசனத்தைப் போதியாமல், பந்திவிசாரணை செய்வது தகுதியல்ல. அப்போஸ்தலர் 6:2

இரண்டு பக்கங்கள் செயல்படுவதை நாம் காண்கிறோம்: திருச்சபை வளர்ந்து கொண்டிருந்தபோது, சாத்தானின் செல்வாக்கும் அதிகரித்து வந்தது.

சற்று நிறுத்தி,

"தேவாலயம் வளர தேவன் அனுமதிக்கிறார் என்றால், இந்த கவனச்சிதறல்களைக் கொண்டுவர சாத்தானை அவர் ஏன் அனுமதிக்க வேண்டும்? அவர்களை தடுத்திருக்க முடியாதா?"

என்று கேட்டால்,

பதில் இதுதான்: தேவன் எதிரி செயல்பட அனுமதிக்கிறார். ஏனென்றால் நாம் எதிர்கொள்ளும் போராட்டங்கள் நம்மைச் செம்மைப்படுத்தி, நம்மைப் பலப்படுத்துகின்றன, மேலும் வளர உதவுகின்றன.

எப்படி மேற்கொண்டார்கள்?

ஆதலால் சகோதரரே, பரிசுத்த ஆவியும் ஞானமும் நிறைந்து, நற்சாட்சி பெற்றிருக்கிற ஏழுபேரை உங்களில் தெரிந்துகொள்ளுங்கள்; அவர்களை இந்த வேலைக்காக ஏற்படுத்துவோம். நாங்களோ ஜெபம்பண்ணுவதிலும் தேவவசனத்தைப் போதிக்கிற ஊழியத்திலும் இடைவிடாமல் தரித்திருப்போம் என்றார்கள். அப்போஸ்தலர் 6:3-4

• அகநோக்குப்பார்வை : உள்ளே பார்ப்பது vs. வெளியே பார்ப்பது - அப்போஸ்தலர்கள் ஒருவரையொருவர் குற்றம் சாட்டவோ அல்லது யார் பக்கமோ இருக்கவில்லை. அதற்கு பதிலாக, அவர்கள் தங்கள் பணியையும் கர்த்தருக்கான அர்ப்பணிப்பையும் சுயபரிசோதனை செய்தனர். இது ஒரு மதிப்புவாய்ந்த பாடம். பிரச்சினைகள் எழும்புகையில், வெளிப்புறமாகப் பார்ப்பதற்கு முன்பு முதலில் உங்கள் சொந்த வீட்டை ஆராய்ந்து பாருங்கள்.

  • அவர்கள், ஜெபத்தையும் வார்த்தையின் ஊழியத்தையும் புறக்கணிக்கும் அளவுக்கு, பரிமாறுவதில் கவனம் செலுத்தினார்கள்.

  • ஜெபத்திலும் தேவனுடைய வசனத்தைப் பரப்புவதிலும் புதுப்பிக்கப்பட்ட கவனத்தை தூண்டுவதற்காக, "பெருந்தீனியின் ஆவியை" சபைக்குள் அறிமுகப்படுத்த தேவன் சாத்தானை அனுமதித்தார்.

  • பை, ஜெபம் மற்றும் தியானத்தின் மீது கட்டப்பட்டுள்ளது. இதற்கு முன்னுரிமை அளிப்பதை இரண்டாம் பட்சமாக எடுத்துக் கொண்டால், சபை சவால்களை சந்திக்க நேரிடும்.

• வளர்ச்சியை எளிதாக்குவதற்கு திருச்சபை மாற்றங்களைச் செய்ய தயாராக இருந்தது.

  • அப்போஸ்தலர்கள் தங்கள் அதிகாரத்தையும் பொறுப்புகளையும் பகிர்ந்துகொள்ள தயாராக இருந்தனர், ஊழியத்தின் விரிவாக்கத்திற்கு மற்றவர்கள் பங்களிக்க அனுமதித்தனர்.

• ஆவி மற்றும் ஞானத்தில் கவனம் - ஆவியினாலும் ஞானத்தினாலும் நிரப்பப்பட்ட ஒருவரைத் தேர்ந்தெடுப்பதே பிரச்சனைக்கானத் தீர்வாக இருந்தது (உலக ஞானம் அல்ல, பரிசுத்த ஆவியானவரின் மூலம் தெய்வீக நுண்ணறிவு). "ஆவியினுடைய அநுக்கிரகம் அவனவனுடைய பிரயோஜனத்திற்கென்று அளிக்கப்பட்டிருக்கிறது. எப்படியெனில், ஒருவனுக்கு ஆவியினாலே ஞானத்தைப் போதிக்கும் வசனமும், வேறொருவனுக்கு அந்த ஆவியினாலேயே அறிவை உணர்த்தும் வசனமும்", என்று 1 கொரிந்தியர் 12:7-8 கூறுகிறது.

• தீர்வு: ஏழு பேரைத் தேர்ந்தெடுப்பது - இந்த யோசனை சபையாரெல்லாருக்கும் பிரியமாயிருந்தது. அப்பொழுது விசுவாசமும் பரிசுத்த ஆவியும் நிறைந்தவனாகிய ஸ்தேவானையும், பிலிப்பையும், பிரொகோரையும், நிக்கானோரையும், தீமோனையும், பர்மெனாவையும், யூதமார்க்கத்தமைந்தவனான அந்தியோகியா பட்டணத்தானாகிய நிக்கொலாவையும் தெரிந்துகொண்டு, அப்போஸ்தலர் 6:5

  • அவர்கள் ஆறு கிரேக்க யூதர்களையும் ஒரு புறஜாதி யூதரான நிக்கோலாவையும் தேர்ந்தெடுத்தனர்.

  • ஏழு பேருக்கும் அவசியமான ஆவி மற்றும் ஞானத்தால் நிறைந்திருப்பதற்கான அளவுகோல்களை பூர்த்தி செய்யும் வகையில், ஸ்தேவான் விசுவாசமும் பரிசுத்த ஆவியும் நிறைந்த ஒரு மனிதனாக  விவரிக்கப்பட்டது குறிப்பிடத்தக்கது.

  • இவர்களில் இருவர் பின்னர் தேவனால் மிஷனரிகளாக பயன்படுத்தப்பட்டனர்: விசுவாசத்திற்காக முதல் இரத்தசாட்சியாக மரித்த ஸ்தேவான் - அப்போஸ்தலர் 7:54-60, மற்றும் முதல் மிஷனரியாக இருந்த பிலிப்பு - அப்போஸ்தலர் 8:5-13, 26:40 / அப்போஸ்தலர் 21:8. தேவன் நமக்கு முன் வைக்கிற பொறுப்புகளில் நாம் உண்மையுள்ளவர்களாக இருக்கும்போது, அவர் நம்மை வல்லமையாக பயன்படுத்த முடியும் என்பதை அவர்களுடைய உதாரணம் காட்டுகிறது.

  • தேவனுடைய வார்த்தை நம்மை என்ன செய்ய வழிகாட்டுகிறதோ, அதைச் செயல்படுத்தும்படி, அவர்கள் ஒருவருக்கொருவர்  ஊழியக்காரர்களாக அன்பினால் கர்த்தரைச் சேவித்தார்கள். சகோதரசிநேகத்திலே ஒருவர்மேலொருவர் பட்சமாயிருங்கள்; கனம்பண்ணுகிறதிலே ஒருவருக்கொருவர் முந்திக்கொள்ளுங்கள். ரோமர் 12:10

  • உத்தியோகபூர்வமாக உதவிக்காரர்கள் என்று பெயரிடப்படாவிட்டாலும், 1 தீமோத்தேயு 3:8-13 மற்றும் பிலிப்பியர் 1:1 ஆகியவற்றில் விவரிக்கப்பட்டுள்ளபடி உதவிக்காரர்களின் அனைத்து தகுதிகளையும் அவர்கள் நிரூபித்தனர்.

• இதைத் தொடர்ந்து, திருச்சபையின் கவனம் இரண்டு விஷயங்களில் மட்டுமே இருந்தது: ஜெபம் மற்றும் வார்த்தையின் ஊழியம்.

  • ஆதித் திருச்சபையில், ஜெபம் ஒரு மைய ஊழியமாக இருந்தது, அதேபோன்ற மனநிலையை நாமும் கடைப்பிடிக்க வேண்டும். இன்று செய்தி பெரும்பாலும் முன்னுரிமை பெறுகிறது, ஜெபம் இரண்டாம் பட்சமாக கருதப்படுகிறது.

  • முதல் முன்னுரிமை ஜெபம்.

  • இரண்டாவது முன்னுரிமை வார்த்தையின் ஊழியம்.

• அவர்கள் ஏழு பேரை நியமித்தபோது, அவர்கள் முதலில் ஜெபம்பண்ணி, பின்னர் அவர்கள் மீது கைகளை வைத்து ஆசீர்வதித்தார்கள். ஜெபம் முதலில் வந்தது - அவர்களை அப்போஸ்தலருக்குமுன்பாக நிறுத்தினார்கள். இவர்கள் ஜெபம்பண்ணி, அவர்கள்மேல் கைகளை வைத்தார்கள். அப்போஸ்தலர் 6:6

• இந்த சுயபரிசோதனை மற்றும் ஜெபத்தின் விளைவு என்ன?

• தேவவசனம் விருத்தியடைந்தது; சீஷருடைய தொகை எருசலேமில் மிகவும் பெருகிற்று; ஆசாரியர்களில் அநேகரும் விசுவாசத்துக்குக் கீழ்ப்படிந்தார்கள். அப்போஸ்தலர் 6:7

  • சபை விரைவான வளர்ச்சியை அடைந்தது. சீஷருடைய தொகை எருசலேமில் மிகவும் பெருகிற்று.

  • பரிசுத்த ஆவியை உள்ளடக்கிய இரண்டு-படி செயல்முறைக்கு நன்றி, வசனம் வேகமாகப் பரவியது.

    • முதலாவதாக, வசனத்தைப் பரப்புவதற்கு சீஷர்கள் பொறுப்பேற்றனர்.

    • இரண்டாவதாக, பரிசுத்த ஆவியானவர் ஒளியின் வேகத்தில் பலரைச் சென்றடைவதை உறுதி செய்தார்.

  • மக்கள் மத்தியிலும் சபையிலும் கீழ்ப்படிதலின் ஆவி வந்தது.

  • விசுவாசத்தின் ஆவி மக்களிடமும் ஆதி திருச்சபையின் மீதும் வேரூன்றியது.

  • இந்த முடிவுகள் அனைத்தும் அப்போஸ்தலர் 5 இல் விவரிக்கப்பட்டுள்ளபடி, ஆவியால் நிரப்பப்பட்ட சபையைப் பிரதிபலிக்கின்றன.

நாம் கற்றுக்கொள்ள வேண்டிய பாடங்கள்

• கிறிஸ்துவுடனான நமது ஊழியத்தில் அல்லது ஆவிக்குரிய பயணத்தில் சவால்களை எதிர்கொள்ளும்போது, ஆதி திருச்சபை செய்ததைப் போலவே, நமது முன்னுரிமைகள் தேவனுடைய சித்தத்துடனும் நமக்கான அவரது திட்டத்துடனும் ஒத்துப்போகின்றனவா என்பதை உறுதிப்படுத்த நாம் சுயபரிசோதனை செய்ய வேண்டும்.

• நாம் புதிய ஆசீர்வாதங்களைப் பெறும்படியாக அவருடைய சித்தத்திற்கு ஏற்ப நம்மைத் திருத்திக்கொள்ள உதவ தேவன் இந்தப் போராட்டங்களை அனுமதிக்கிறார்.

• நமது மனப்பான்மை ஆதி திருச்சபை போல இருக்க வேண்டும். தேவனுக்கு முன்னுரிமை (ஜெபம் / தியானம் / தேவனுடைய வார்த்தையைப் பரப்புதல்) மற்றவை பின்பு  (பணம் / உலக முன்னுரிமைகள் போன்றவை). இந்த அம்சங்களில் நீங்கள் தடம் மாறிவிட்டீர்களா என்று பார்க்க முற்படுங்கள்.

• "தேவன் ஏன் இந்தப் போராட்டங்களை எனக்கு அனுமதித்தார்?" என்று குறை சொல்லாதீர்கள். அப்படி செய்தால், நீங்கள் சாத்தானுக்கு இடம் கொடுக்கிறீர்கள். மேலும், உங்களுக்கு வழங்கப்பட்ட தேவனுடைய  கிருபையை கேலி செய்கிறீர்கள்.

• இந்த சவால்களை மனத்தாழ்மையுடன் அணுகுங்கள். தேவனைத் தேடுங்கள், அவருடைய முன்னுரிமைகளிலிருந்து எங்கு விலகிச் சென்றிருக்கிறீர்கள், அவரது சித்தத்தைத் தேடுவதற்குப் பதிலாக உங்கள் சுய முடிவுகளுடன் நீங்கள் சென்ற மாற்றுப்பாதைகள் எல்லாவற்றையும் சிந்தியுங்கள்.

• ஜெபம் மற்றும் உபவாசம் தீர்வுகளை வழங்குவதோடு சவால்களை முறியடிக்கிறது. நீங்கள் ஜெபிக்கும்போது, தேவனுடைய சமாதானம் அவருடைய கட்டுப்பாட்டை நமக்கு உறுதியளிக்கிறது. நம்மை நிலையாக வைத்திருந்து, கஷ்டங்களை மேற்கொள்ள அவரை சார்ந்திருக்க வைக்கிறது.

• முதலில் தேவனுடைய பரிசுத்த ஆவியானவரிடமிருந்து வழிநடத்துதலைத் தேடுங்கள். பிறகு உங்கள் பொது அறிவையும் ஞானத்தையும் பயன்படுத்துங்கள். இந்த வரிசையை மாற்றுவதைத் தவிர்க்கவும்.

• கடைசியாக, தேவனுடைய அன்பு பெரும்பாலும் போராட்டங்களையும் சவால்களையும் அனுமதிப்பதன் மூலம் சிட்சை மூலம் திருத்தம் செய்வதை உள்ளடக்கியது என்பதை உணர்ந்து கொள்ளுங்கள். சிலருக்கு, இது மென்மையான திருத்தமாக இருக்கலாம், மற்றவர்களுக்கு, இது ஒரு பள்ளி ஆசிரியர் ஒரு பிரம்பை எடுத்து முதுகில் அடிப்பது போன்ற கடுமையான சிட்சையாக இருக்கலாம். தேவன் தாம் நேசிப்பவர்களை சிட்சிக்கிறார் என்று வேதம் கூறுகிறது. கர்த்தர் எவனிடத்தில் அன்புகூருகிறாரோ அவனை அவர் சிட்சித்து, தாம் சேர்த்துக்கொள்ளுகிற எந்த மகனையும் தண்டிக்கிறார் என்று பிள்ளைகளுக்குச் சொல்லுகிறதுபோல உங்களுக்குச் சொல்லியிருக்கிற புத்திமதியை மறந்தீர்கள். எபிரெயர் 12:6.